Airbnb ги ажурираше своите политики за да го ограничи она што домаќините можат да го бараат од своите гости, вклучително и барањата поврзани со чистењето.
Според новите насоки, домаќините сега можат да постават седум стандардни „куќни правила“, покрај другите „разумни“ барања.
Од Airbnb наведуваат дека од гостите – кои веќе плаќаат надомест за чистење – повеќе не треба да се бара извршување задачи што вообичаено ги врши професионален чистач, како што се миење садови или вадење на постелнината од креветите.
Новите правила ќе се применуваат за сите резервации направени на платформата од 20 ноември.
„Куќните правила им помагаат на гостите да разберат што очекуваат домаќините од нив, но добивме повратни информации од нашата заедница дека овие правила можат да бидат збунувачки, премногу барани и тешки за почитување“, изјавија од Airbnb за BBC.
„Затоа ги преработивме, така што сега се полесни за наоѓање и појасни за поставување, заедно со нова политика која гарантира дека барањата остануваат разумни и без непријатни изненадувања.“
Според новите правила на веб-страницата на Airbnb, на домаќините генерално повеќе не им е дозволено да бараат од гостите да извршуваат задачи што „бараат значителен напор или време, или кои вообичаено би ги извршил чистач“.
Ова вклучува вадење на постелнината, изнесување на ѓубрето од објектот, или миење и оставање на садовите на место. Од компанијата наведоа дека во одредени случаи се можни исклучоци.
На пример, од гостите може да се побара да го ограничат времето поминато под туш, доколку поради суша се во сила локални ограничувања за потрошувачка на вода.
Во иднина, куќните правила за одреден објект ќе бидат повидливо истакнати за гостите и ќе се појавуваат во потсетниците поврзани со резервацијата.
Посебни договори ќе бидат дозволени само во ограничени околности, на пример кога тоа го бара законот или правилата на здружението на сопственици на станови.
Иако домаќините нема да можат да изрекуваат парични казни, компанијата нагласи дека тие сепак го задржуваат правото да поставуваат куќни правила и барања.
Доколку барањето на домаќинот не е во согласност со политиките на Airbnb, тоа ќе биде означено како проблематично; домаќинот потоа може да поднесе жалба доколку не се согласува со оваа оценка. Со години, гостите се жалат на неразумни обврски што се очекува да ги исполнат пред да го напуштат сместувањето – особено со оглед на тоа што, како дел од резервацијата, плаќаат и надомест за чистење.
Видеата објавени на TikTok од страна на домаќините на Airbnb, Кеси и Џон – во кои тие вршат детален преглед на станот откако гостите ќе заминат – неодамна станаа вирални поради претераната прецизност и барања на парот.
Во едно од видеата, парот ги обвинува гостите за „кршење на куќниот ред“ бидејќи далечинскиот управувач за телевизорот го оставиле на погрешно место.
Иако се соочија со критики поради нивните строги правила и високи стандарди, парот одговори дека нивната содржина била погрешно протолкувана. Нивните видеа послужија како инспирација за други креатори на содржини да направат пародии, исмевајќи ги претерано строгите домаќини.