Иако ниту една храна или пијалак не може сама по себе да го забави метаболизмот, секојдневните избори можат да влијаат врз вкупниот внес на калории, енергетскиот баланс и одржувањето на телесната тежина, предупредуваат нутриционистите.
Еден пијалак што тие особено го издвојуваат е „лате“ со вкус – односно, лате што содржи сирупи, засладено млеко и други додатоци.
„Латето со вкус всушност не го забавува метаболизмот, но големо, засладено лате секој ден може да го отежне одржувањето на здрава телесна тежина“, објаснува нутриционистката Лиза Јанг за „EatingWell“.
Само две лажици од одредени сирупи можат да содржат 23 грама шеќер и околу 90 калории.
Друг проблем е што пијалаците често не го даваат истото чувство на ситост како цврстата храна.
„Тоа значи дека можете да испиете лате со 300 или 400 калории и сепак да го изедете вообичаениот појадок или ужина“, вели Јанг. Нутриционистката Лорен Твиџ додава:
- Иако многу видови лате содржат калории колку еден оброк, во нив недостасуваат хранливи материи што придонесуваат за чувство на ситост, како што се протеини, влакна и масти.
Повременото консумирање лате со вкус не претставува проблем, но секојдневната навика може да го зголеми вкупниот внес на калории.
- Кога висококалоричниот пијалак со кафе ќе стане автоматски дел од вашата секојдневна рутина, вишокот калории може да се натрупа без воопшто да го забележите тоа – предупредува Јанг.
Ако често консумирате вакви пијалаци, едноставни промени – како на пример избор на помала порција, користење помалку сируп или избор на верзија со помалку шеќер – можат да го намалат внесот на шеќер и калории. Нутриционистите ги издвојуваат водата, незасладеното кафе и зелениот чај како поедноставни опции.
– Кафето содржи кофеин, кој може привремено да ја зголеми потрошувачката на енергија, како и природни антиоксиданси кои можат да го поддржат целокупното метаболичко здравје – забележува Твиг, додавајќи дека тој ефект е умерен.
Долгорочните навики – како што се урамнотежената исхрана, физичката активност, соодветниот сон и редовниот внес на вода – се поважни за здрав метаболизам.