Иако сезоната на сандали е пред нас, удобноста на свиленкасто мазни стапала во текот на целата година не треба да се потценува. Клучот за мазни стапала е отстранување на сувите, мртви клетки на кожата, но постои една состојка што навистина може да помогне: гликолна киселина.
Според дерматолозите, хемиските пилинзи се совршени за груби стапала, и тука влегува гликолната киселина, моќна алфа хидрокси киселина (AHA) составена од супер мали молекули кои продираат во кожата и „ја вршат работата“ на ексфолијација. Гликолната киселина е важна бидејќи го зголемува обновувањето на клетките, што значи дека го отстранува горниот, мртов слој на кожата. Bustle пишува дека оваа состојка е омилена меѓу дерматолозите поради нејзината способност да го подобри тонот и текстурата на кожата, да го стимулира производството на колаген, да ги намали темните дамки и да помогне во одржувањето на порите чисти.
Значи, гликолната киселина е идеална за подобрување на текстурата на вашите стапала, како и на остатокот од вашето тело. Испуканите стапала се предизвикани од дехидрирана кожа, што резултира со натрупување на мртви клетки на кожата. Кога кожата е многу задебелена, состојба позната како хиперкератоза, таа е помалку еластична и полесно пука. Тука влегува во игра AHA киселината. Гликолната киселина прво делува така што ја намалува хиперкератозата, а како овлажнувач, „црпи“ влага од воздухот и помага да се хидрира кожата на стапалата.
Бидејќи кожата на стапалата е подебела од онаа на лицето, не треба да се двоумите да посегнете по поголема концентрација на киселина. Дерматолозите препорачуваат хидратантни креми кои содржат 15 до 20 проценти гликолна киселина. Тие препорачуваат производи во кои гликолната киселина е комбинирана со други ефикасни состојки, како што се хидратантни креми или други нежни ексфолијанти. На пример, формулите што содржат хијалуронска киселина или церамиди можат да помогнат во одржувањето на хидрираната кожа.
Процесот е следниов: прво, потопете ги стапалата во млака вода 5 до 10 минути. Исушете ги со тапкање, а потоа нанесете хидратантна крема со гликолна киселина. Ставете памучни чорапи и оставете ги преку ноќ. Ако го повторувате процесот секоја вечер, текстурата на вашата кожа треба да се подобри во рок од неколку недели.
Дерматолозите се согласуваат дека гликолната киселина е безбедна за употреба, но може да ве боцка ако кожата ви е сериозно испукана, па во тој случај ако е неподносливо, прескокнете ја. Ако мислите дека друг проблем придонесува за вашите суви стапала, разговарајте со вашиот дерматолог.