Продукцијата на „Бетмен 2“, во кое Роберт Патинсон се враќа во насловната улога, е привремено стопирана откако режисерот Мет Ривс одлучи да направи пауза за да се посвети на семејни обврски, соопштија од „DC Studios“.
„Продукцијата на ‘Бетмен 2’ е привремено стопирана додека Мет Ривс се фокусира на семејни прашања“, изјави претставник на студиото.
Тој додаде дека Ривс ја има целосната поддршка од „DC Studios“ и дека студиото со нетрпение очекува да продолжи со проектот.
Филмот веќе се соочи со неколку одложувања. Премиерата на „Бетмен 2“ првично беше закажана за 2 октомври 2026 година, но „Warner Bros.“ го помести датумот за 1 октомври 2027 година. Во јули, студиото повторно го одложи филмот, а новата премиера сега е планирана за февруари 2028 година.
Првиот филм на Ривс, „Бетмен“, беше објавен во март 2022 година.
Покрај Патинсон, во актерската екипа на продолжението се вклучени Скарлет Јохансон, Колин Фарел, Себастијан Стен, Енди Серкис и Џефри Рајт.
По првичното одложување на филмот, шефот на „DC Studios“, Џејмс Ган, се осврна на ова прашање на платформата „Threads“, истакнувајќи дека повеќегодишните паузи меѓу продолженијата во големите филмски франшизи се сосема вообичаени.
Како примери, Ган ги наведе временските интервали меѓу филмовите „Alien“ и „Aliens“, како и оние во франшизите „The Incredibles“, „Terminator“, „Avatar“ и „Top Gun“, како и паузата меѓу „Guardians of the Galaxy Vol. 2“ и „Guardians of the Galaxy Vol. 3“.
Во неодамнешното интервју за „Collider“, Патинсон изјави дека „Бетмен 2“ ќе претставува „поинаков пристап“ во однос на првиот филм.
„Тоа е толку амбициозно. Мислам, неодамна реков дека првиот дел беше поинаква верзија на филм за Бетмен, а овој е нешто сосема друго“, рече Патинсон. Тој додаде дека филмот носи вистински пресврт во споредба со првиот дел, но дека задржува дел од неговата атмосфера. Патинсон изјави дека е возбуден за тоа каков ќе биде крајниот резултат.