
Британскиот актер Роберт Патинсон е официјално избран за новиот Џејмс Бонд, пренесува Variety. Со ова завршува повеќемесечната потрага на студиото „Amazon MGM“ по наследник на Даниел Крег.
Патинсон ја презема улогата на агентот 007 од Даниел Крег, кој го толкуваше ликот на Бонд во пет филма, почнувајќи со Casino Royale во 2006 година. Неговото последно појавување беше во филмот No Time to Die од 2021 година, во кој Бонд го жртвува својот живот за да го спаси светот од тајна глобална терористичка организација. Тој филм исто така го означи крајот на серијалот, пред долгогодишните продуценти Мајкл Г. Вилсон и Барбара Броколи да ја продадат креативната контрола врз франшизата на „Amazon MGM“.
Според Variety, шпекулациите околу тоа кој ќе биде новиот Бонд доминираа во медиумите и филмската индустрија во текот на изминатиот месец, при што неколку актери во одредени моменти важеа за главни фаворити. На почетокот се спомнуваше Џејкоб Елорди, иако подоцна излезе на виделина дека ѕвездата од серијата Euphoria всушност никогаш не бил на аудиција.
Џек Лауден се чинеше како солиден избор; на почетокот на септември, еден од неговите колеги од серијата Slow Horses изјави дека новиот Бонд е веќе избран, додавајќи дека тој навива за Лауден. Подоцна, во преден план излезе Калум Тарнер, кој делуваше како речиси сигурен избор, сè додека не се дозна дека на аудиција биле и Патинсон и Николас Холт. Меѓу другите кандидати беа Џош О’Конор, Том Френсис, Арон Тејлор-Џонсон, Харис Дикинсон, па дури и Хари Стајлс.
Variety оценува дека Патинсон е речиси сигурно најбараната филмска ѕвезда оваа година – тврдење поткрепено со комерцијалниот успех на неговите филмови. Филмот The Drama, во кој тој игра главна улога заедно со Зендаја, оствари заработка од 134 милиони долари ширум светот, наспроти буџетот од 28 милиони долари, додека Primetime — во кој го толкуваше телевизискиот водител Крис Хансен — заработи 61 милион долари со буџет од 18 милиони долари.
Патинсон го играше Антиној во The Odyssey, филм кој заработи 1,8 милијарди долари, а исто така се очекува да се појави и во Dune: Part Three, кој излегува овој декември. Режисер на тој филм е Дени Вилнев — кој, според најавите, ќе го режира и новиот филм за Џејмс Бонд — што го наведе магазинот Variety на претпоставката дека Патинсон можеби ја добил улогата откако го импресионирал режисерот, кој е четирикратен кандидат за Оскар.
Актерот исто така има искуство со големи филмски франшизи. Тој првпат ја презеде улогата на Бетмен во филмот Бетмен од 2022 година, во режија на Мет Ривс, а се очекува да се врати во Готам за продолжението во 2028 година. Обврските поврзани со таа улога често се наведуваа како причина поради која тој можеби нема да може да го игра Бонд; сепак, по неколкуте одложувања на The Batman Part II, се чини дека тој сега е слободен за уште еден долгорочен ангажман, пренесува Variety. Студиото „Amazon MGM“ го ангажираше Вилнев, режисерот на филмовите Sicario, Arrival и Prisoners, да го режира новиот филм за Џејмс Бонд во јуни 2025 година. Во тоа време, тој изјави дека е „голем обожавател на Бонд“ и дека планира да „отвори пат за многу нови мисии“.