Здравата, мека и сјајна кожа е врвен стандард за корејските жени кои посветуваат многу повеќе внимание на негата на лицето отколку на шминката. Тие имаат холистички пристап кон негата на кожата.
Корејските жени навистина се грижат за својата кожа – како да е скапоцено поглавје. Нивната посветеност на негата се рефлектира не само во бројот на производи што ги користат, туку и во самата техника на нанесување. Нема да забележите ниту една Корејка да нанесува крем за лице во погрешна насока, бидејќи секогаш имаат на ум дека одредени движења го забрзуваат опуштањето и стареењето на кожата. Значи, ова се само некои од врвните правила за нанесување на одредени производи од кои овие жени не отстапуваат.
Пена за чистење на кожа
Корејските жени се познати по нивното двојно, па дури и тројно чистење на лицето, кое се базира на многу благи формулации. Самата постапка обично започнува со отстранување на шминка со средства за чистење на база на масло, кои потоа отстапуваат место на средства за чистење на база на вода. Главната работа тука се пените што продираат подлабоко во порите и ги отстрануваат преостанатите нечистотии, правејќи ја кожата мека. Овој производ мора да се нанесе со кружни движења, со што лицето добива нежна масажа. После тоа, плакнењето со ладна вода е од суштинско значење – за да се затворат порите.
Тоник за лице е задолжителен
По чистењето, доаѓа уште еден важен чекор во корејскиот режим на убавина, кој вклучува употреба на тоници. Нивната улога не е само дополнително да го исчистат лицето, туку и да ја надополнат изгубената влага и да ја подготват кожата за апсорбирање на состојките од есенциите, серумите и кремите. Според правилата на корејската рутина за убавина, тониците мора да се нанесат на влажна кожа, веднаш по чистењето.
Крем за лице
Овој производ е еден од најважните во синџирот на нега. Во утринскиот режим се препорачуваат полесни формули, додека вечерта е „резервирана“ за похранливи. Хидратантните креми најдобро се нанесуваат со тапкање со врвовите на прстите. Ова дополнително ќе ја стимулира циркулацијата, додека кремите за очи треба да се тапкаат со врвовите на прстите.
Маска за лице
Хидратантниот третман со маска за лице е задолжителен во корејската рутина за нега на кожата најмалку еднаш неделно. Маските за лице доаѓаат во форма на „марамче“ и содржат поголема количина состојки, слични на оние во серумите. Тие имаат прорези за очите, устата и носот и лесно се нанесуваат на лицето. Треба да се остават околу дваесет минути, а потоа да се отстранат. Но, тоа не е сè – по отстранувањето на маската, преостанатиот серум треба да се втрие во кожата со масажа.
Кои други императиви имаат Корејките?
Тие се залагаат за холистички пристап кон негата, па затоа пиењето соодветна количина вода, јадењето храна базирана на зеленчук и квалитетниот сон (периодот од 22 часот до 2 часот наутро се смета за особено совршено време за ревитализација на целото тело!) се апсолутно неопходни.