Една од култните туристички атракции во Њујорк – возењето во кочии со коњска запрега низ Централ Парк – наскоро би можело да замине во историјата.
Според американските медиуми, градскиот претставник на Њујорк, Зоран Мамдани, и членката на Градскиот совет, Џули Менин, постигнале договор за предлог-закон со кој би се ставило крај на оваа долгогодишна практика.
Овој потег доаѓа по несреќата во јуни, во која еден турист од Индија загина откако падна од кочија, а исто така следи по повеќегодишните барања од активистите за правата на животните за забрана на ваквите возења.
Според предлогот, забраната би се воведувала постепено, а целосно би стапила на сила на 1 јуни 2028 година. Пред тоа, законскиот предлог мора да добие поддршка од Градскиот совет на Њујорк. Гласањето се очекува кон крајот на следната недела, а Менин изрази уверување дека предлогот ќе го добие потребното мнозинство.
„Индустријата за кочии со коњска запрега во Њујорк доаѓа до својот крај. Нашата администрација ќе се погрижи работниците и сопствениците да бидат заштитени, а коњите да бидат безбедни“, напиша Мамдани доцна во вторникот на социјалната мрежа X.
Укинувањето на возењата со кочии во Њујоршкиот Централ Парк е предмет на дебата со години. Оваа практика постои околу 150 години и продолжува да привлекува многу туристи, но истовремено наидува на критики од организациите за заштита на животните. Активистите тврдат дека коњите се изложени на прекумерен напор, дека условите во кои се чуваат се несоодветни, како и дека бучавата и сообраќајот можат да предизвикаат паника кај нив. Од друга страна, оние што ја нудат оваа услуга ги отфрлаат овие обвинувања.
Сепак, низ годините се забележани неколку несреќи поврзани со возењето во кочии. Еден таков инцидент се случи во јуни, кога осумнаесетгодишник од Индија – кој бил во посета на Њујорк со своето семејство – почина од повредите здобиени при пад.
Младиот човек скокнал од кочијата за да стигне до својата мајка, која претходно испаднала од неа. Притоа, тој се здобил со тешка повреда на главата и набргу потоа починал во болница.