Грицките како колачиња и чипс обично ни се прв избор, но тие се високо преработена храна – што, се разбира, е штетно за нас.
Нутриционистот Роб Хобсон издвои неколку минимално преработени грицки кои можат да послужат како здрава алтернатива.
Кога ќе нè фати глад, најмногу нè привлекува храна богата со масти, шеќер и сол – дури и оние од нас кои се најдисциплинирани и посветени на здравата исхрана.
Тоа е така бидејќи ваквите грицки обично се ултра-преработени производи (UPF), што значи дека се создадени во лаборатории за да бидат привлечни и исклучително вкусни.
Хобсон одлучил да го намали внесот на ултра-преработена храна поради нејзината поврзаност со здравствени проблеми како што се кардиоваскуларни болести, дијабетес и одредени видови рак.
Тој за „Business Insider“ откри кои минимално преработени намирници ги купува кога е гладен и во брзање.
- Плочки од овошје и јаткасти плодови
Протеинските плочки честопати се ултра-преработени, иако можат да се консумираат и за време на диета – под услов да се јадат умерено.
Сепак, грицките направени исклучиво од суво овошје и јаткасти плодови се дефинитивно подобра, минимално преработена опција достапна во продавниците.
Јаткастите плодови се добар извор на растителни протеини и содржат масти кои се корисни за здравјето на срцето.
- Хумус со зеленчук
Уште една здрава опција за ужина е хумус во комбинација со сечкан зеленчук, како на пример стапчиња од морков. Хумусот содржи наут – извор на влакна и протеини – како и маслиново масло, кое обезбедува здрави масти.
- Путер од кикирики со оризови галети
Оризовата галета, која служи како замена за леб, може да биде одлична ужина богата со протеини – иако со малку повисока калориска вредност – кога е намачкана со путер од кикирики.
- Пуканки
Можеби сте навикнати да уживате во пуканки прелиени со сол и путер додека гледате филм, но обичните пуканки се многу здрава ужина со малку калории.
Пуканките се една од оние намирници што можете да ги јадете во поголеми количини без чувство на вина. Исто така, таа е богата со влакна и се смета за полнозрнеста храна, што се поврзува со намален ризик од дијабетес и кардиоваскуларни заболувања.
- Свежо овошје
Иако можеби изгледа очигледно, свежото овошје – како што се бобичестите плодови, бананите, портокалите и јаболката – е практично за земање и јадење во движење.
Нема да најдете помалку преработена ужина од тоа.