Замрзнувањето на домашните оброци и остатоци е одличен начин да ги чувате вкусните оброци при рака и да поттикнете повеќе домашно готвење. Додека многу традиционални замрзнати оброци како супи и лазањи добро се држат во замрзнувач, други намирници, како хумусот, исто така може да се замрзнат.
Сепак, потребна е посебна грижа при замрзнување и одмрзнување на хумусот за да се зачува неговиот вкус и мазна текстура и да се спречи да стане зрнест.
Експертите Трејси Вајнтрауб, готвач и основач на компанијата „Gracefully Fed“ и Карла Шван, вонреден професор и специјалист за безбедност на храната, открија за веб-страницата на Марта Стјуарт најдобриот начин за замрзнување на хумусот, колку долго може да трае во замрзнувачот и едноставен трик за враќање на неговата кремаста конзистенција по одмрзнувањето, за да не добие зрнеста текстура.
Како да се одмрзне и да се врати кремастата текстура на замрзнатиот хумус
Префрлете го хумусот од замрзнувачот во фрижидер и оставете го да се одмрзне преку ноќ. Ова му овозможува постепено да се одмрзнува и помага да се спречи одвојувањето на состојките.
За да ја вратите текстурата по одмрзнувањето, префрлете го хумусот во процесор за храна и измешајте го со свеж сок од лимон и маслиново масло. Замрзнувањето може да го омекне вкусот на лук и лимон, вели Шванова, па затоа повторното додавање на тие состојки му помага на хумусот да има свеж вкус.
Ако хумусот се одвоил, додадете малку вода и таан заедно со маслиново масло и сок од лимон за повторно да го направите мазен и кремаст.
Како правилно да замрзнете хумус
Домашниот хумус е лесен за подготовка и често е повкусен од купениот хумус. Ако планирате да го замрзнете за подоцна, неколку едноставни совети за складирање можат да му помогнат да ја задржи својата кремаста текстура.
Вајнтраубова и Шванова препорачуваат складирање на хумусот во херметички затворени садови. При полнење, оставете најмалку 1,25 см простор до врвот на садот за да се овозможи ширење за време на замрзнувањето. „Замрзнувањето во помали порции е најдобро“, забележува Шванова. „Тенок слој маслиново масло одозгора може да помогне во намалувањето на согорувањето од замрзнувачот и зачувување на квалитетот.“
Тој слој маслиново масло може да му помогне на хумусот да ја задржи својата конзистенција, правејќи го помазен и покремаст по одмрзнувањето.
Колку долго може да трае хумусот во замрзнувачот
Додека многу замрзнати прехранбени производи можат да траат од шест месеци до една година, хумусот е најдобро да се јаде порано. Вајнтрауб и Шван препорачуваат да се чува во замрзнувачот не подолго од три до четири месеци, бидејќи текстурата и вкусот може да се влошат по тој период.
Хумусот што е замрзнат на -17,8°C (-5°F) ќе остане безбеден за јадење на неодредено време, вели Шван, но неговиот квалитет може да се намали до тој степен што повеќе нема да биде пријатен за јадење.