Протестирајќи против забраната за одржување верски служби, свештеник во Аргентина ја претвори црквата во бар.
Во црквата се поставени бар маси, а свештениците, обучени како келнери, носат Библии на послужавник.
– Вака се облековме, затоа што се чини дека ова е единствениот начин на кој можеме да го пренесеме Божјото Слово. Затоа, покрај телешкото, зборот Божји доаѓа на маса бр. 4 – рече свештеникот Даниел Катанео, обучен како келнер во евангелската црква Комунидад Редентор во градот Сан Лоренцо во Аргентина.
Катанео, како и многу други свештеници, верува дека тие биле дискриминирани бидејќи другите активности низ целата земја постепено се отвараат, а религиозните сè уште се под клуч.
– Сакаме да ни се даде законско право да му служиме на Бога – изјави Катанео пред локалните медиуми и праша зошто може да се отвараат барови и продавници, а да се дискриминираат црквите.
Иако корона вирусот продолжува брзо да се шири во главниот град на Аргентина, Буенос Аирес и нејзините предградија, остатокот од земјата е без голем број заразени.
Во Аргентина биле заразени 28.764 лица, а 802 починале.
Вчера во Аргентина се регистрирани 1.400 нови случаи, од кои повеќето се во главниот град.