Легендарниот воз Ориент Експрес се враќа во својот поранешен сјај. Француската компанија Accor обновува 17 од оригиналните вагони како дел од патничкиот воз порано познат како Nostalgie Istanbul Orient Express, кој сообраќал во 1920-тите и 1930-тите.
Планот за реставрација на патничкиот воз беше претставен како дел од неодамна одржаниот саем Design Miami во Мајами Бич, Флорида.
Посебно внимание на презентацијата привлекоа плановите за нов луксузен претседателски апартман со две спални соби и простор за одмор кој ќе ја зафаќа целата кочија, односно на 55 квадратни метри.
Луксузната кабина долга 21 метар и широка три метри ќе биде украсена со махагони, а мебелот ќе биде по нарачка и обложен со везено кадифе.
Во рамките на претседателскиот апартман ќе има место и за елегантна бања посветена на прославениот француски дизајнер на мебел Албер-Арман Рато.
Во 2024 година од Париз би требало да почне да работи подобрена верзија на Ориент експрес, а колку ќе чини изнајмувањето на претседателскиот апартман останува да видиме.
Ориент Експрес е патнички воз кој првично започнал да сообраќа во 1883 година меѓу Париз и Истанбул, а стана симбол на луксузно патување благодарение на описите во книгата на Агата Кристи – „Убиство во Ориент Експрес“.