Водните градини и палатата на карпата до која се стигнува по 1200 скалила, кријат возбудливо минато и не престануваат да фасцинираат со софистицираниот начин на изработка, изненадувачки напреден за времето во кое се создадени…
Опкружена со светло портокалов песок и живи мајмуни кои љубопитно ги набљудуваат минувачите со надеж дека ќе добијат некој залак за јадење, гордо стои Сигирија, древна карпеста тврдина и археолошки локалитет во централна Шри Ланка.
За време на пандемијата, местото било потивко од вообичаено, бидејќи немало илјадници туристи кои прашувале за пештерите на вулканските „Лавовски карпи“ со висина од 370 метри. Денес работите се враќаат на еднакво ниво на гужва.
Во почетокот таму се наоѓал будистички манастир, а нешто подоцна, во петтиот век, кралот Касјапа таму изградил комплекс, кој некои го сметале за осмо светско чудо. На врвот на мистичното ремек-дело на природата се наоѓа палатата со Лавовска порта, која некогаш влевала стравопочит во форма на огромниот животински крал.
Денес, фантазијата ја будат само преостанатите шепи на лавот, како и сликите на небесните нимфи, кои стилски наликуваат на фреските од Ајанта. Некои веруваат дека сликите всушност прикажуваат 500 конкубини кои биле во служба на кралот.
Но, подножјето на карпата со долниот дворец и огромната рамнина со ѕидови, ровови и градини фасцинира не помалку. Сигиријските градини не се само најдобро зачуваните водни градини во Јужна Азија, туку и една од најстарите уредени градини во светот. Низ нив во петтиот век поминале важни гости, одејќи по патеката од повеќе од 1.200 скалила што водат до палатата. Играта на симетрија и асиметрија која се спојува со природата е навистина за восхит.
Градините се состојат од три различни, но меѓусебно поврзани делови: водни градини, пештери и кружни тераси. Уметнички украсените базени, фонтани, потоци и платформи каде изведувачите некогаш доаѓале и настапувале во павилјони би биле еквивалент на луксузно одморалиште за богатите денес. Изненадувачки деталниот дизајн е само почеток на приказната за водените градини. Софистицираниот систем за вода е неверојатен поради начинот на кој функционира: знаењето за хидрауликата и гравитацијата создало воден спектакл од подземни тунели до базени и фонтани кои непречено функционираат речиси 1500 години подоцна.