Да имавме денар секој пат кога шетајќи низ градот ќе видиме пукнатини или дупки на тротоарот. Повеќето од нив стојат така со години: некои ги виткаат зглобовите во нив, а оние што се веќе искусни и навикнати знаат каде да скокаат.
За некого вознемиреност, за други инспирација – вака би можеле да го опишете потфатот на францускиот уметник Емемем од Лион, кој ги поправа француските тротоари и ги претвора во мали уметнички дела достапни за секого.
Почнал со „крпење“ пред неговата улица, која пред тоа изгледала како обична, стара, темна и досадна улица. Изработил мали шарени украси со парчиња керамика што веќе ги имал во работилницата, а кога задоволно ја погледнал завршената работа, се родила љубов. Почнала уште една акција, па друга, па трета…
Наскоро, тој го покрил својот град со повеќе од 350 мали мозаици, поради што почнал да биде поканет во други земји, од Норвешка и Шкотска до Германија и Италија и градови низ цела Франција.
Својот метод на работа тој го опишува како „flacking“, чин на љубов, поправка и присвојување на место, односно јавен простор што често го запоставуваме и кој треба да биде природен како домот што го имаме во нашите четири ѕида. Пукнатините и дупките на тротоарите се полни со керамика, стакло, камен или кој било материјал што се покажува доволно издржлив.
Тој ги прави уметничките интервенции навечер, така што наутро минувачите ќе ги дочекаат пријатни изненадувања. Ги смета за еден вид љубовни пораки.
Станува збор за процес кој потсетува на познатата јапонска техника Kintsugi, во која пукнатините на керамиката се прифаќаат и се поправаат со нивно полнење со злато. Филозофијата зад неа е да се прифати несовршеноста и да се најде убавина во оштетеното и скршеното. Тоа доаѓа како мешавина од чувство на жалење за нешто што не успеало, но и потреба да се прифати промената. Преведено во пракса (и злато), се создава нешто ново, поубаво од порано.
Во оваа смисла, тоа е применливо и за човечкиот живот – промените треба да се прифатат, грешките, дефектите и немилите настани да се прифатат како дел од животот.
