Кампунг Пеланги, индонезиско село во боите на виножитото, е доказ како една мала финансиска инвестиција и желбата на локалното население може да направи нешто неверојатно.
До неодамна тоа беше село за кое главно знаеја само мештаните и нивните роднини. Сместено во централниот дел на островот Јава, на југот на Самаранд, изгледаше прилично тажно, со многу трошни куќи и запуштени улици.
Меѓутоа, по неодамнешната реставрација, стана познато како селото Виножито и една од најпознатите туристички атракции во тој дел на Индонезија.
Лабаво преведен од локалниот јазик, Kampung Pelangi значи место со шарени бои, а поради овој необичен проект го доби и прекарот Rainbow Village.
Денеска секоја од 232-те куќи е вистинско уметничко дело, создадено на иницијатива на вработените во локалната гимназија и мештаните, со финансиска поддршка од Владата во износ од 20.000 американски долари.
Сите мештани беа вклучени во процесот на обнова на куќите и селото кое денес може да се пофали со неверојатна експлозија на бои.
Не само куќите, туку и улиците и мостовите се обоени во светли, весели бои и украсени со бројни, многу интересни мурали. Не е чудно бидејќи љубителите на добри фотографии за социјалните мрежи беа меѓу првите кои го открија ова село во боите на виножитото како многу атрактивна локација за оригинални фотографии.
Благодарение на прилично едноставен проект, кој се покажа како многу ефикасен, стана сосема јасно колку малку е всушност потребно за да се промени целата околина на подобро.
А колку е добра промената, најдобро говори фактот што истиот модел го усвоија жителите на уште неколку индонезиски села.
Селаните од Кампунг Пеланги успеаја да покажат и докажат дека едно место може да се оживее само со малку труд и, гледано во светски размери, со минимални финансиски средства. Денес, ова село е олицетворение на комбинација на имагинација и необични бои, што го прави апсолутно единствено и во земјата и во светот.