Дури и ако неодамна сте се вратиле од заслужен одмор, постојат сите шанси да фантазирате за повторно одење на патување многу наскоро.
Благодарение на допаминот, радоста од очекуваната награда може да биде позначајна од самата награда, покажуваат резултатите од една научна студија, a наведува Си-Ен-Ен. Сепак, нема многу литература која укажува на директните придобивки од одморот за човечкиот мозок.
Според резултатите од студијата спроведена во 2016 година на 46 работници на една холандска компанија, утврдено е дека придобивките од одморот врз човечкиот мозок се од суштинско значење. Она што беше забележано во текот на ова истражување е дека по неколку недели одмор, учесниците во студијата покажаа многу поизразена когнитивна флексибилност.
Една од главните причини за ова подобрување е намалувањето на стресот, на кој луѓето неспорно се изложени на нивните работни места, во поголема или помала мера.
Иако не е спорно дека стресот е присутен кај сите, постојат ситуации кога тој не се одразува негативно на поединците. Дури и понекогаш, кога човек одвреме-навреме е изложен на стресни ситуации, може да се каже дека тоа е дури и корисно за поединецот.
Меѓутоа, проблемот настанува кога човек долго време е изложен на стресни ситуации на своето работно место, па тоа преминува во хроничен стрес. Потоа индиректно се појавуваат замор, незадоволство од работата, а често и раздразливост, па дури и лутина, што сето тоа негативно влијае на работната мотивација.
Одмор за подобри работни перформанси
За да може одморот да се окарактеризира како добар, а некој навистина да „наполни батерии“, потребно е во тој период нивото на стрес да биде на минимум.
А тоа во пракса значи дека навистина треба да се „исклучите“ во тој период, и да не одговарате на мејлови, повици и пораки поврзани со работата и колку што е можно повеќе да не се грижите за рокови, проекти и слично. Затоа, уживајте во вашиот одмор како таков.
Следното нешто што е важно за успешен одмор е да чекате одмор, колку и да звучи нелогично. Само исчекувањето на долгоочекуваниот одмор доведува до лачење на претходно споменатиот допамин, кој исто така влијае на зголемување на задоволството и намалување на незадоволството.
И затоа, потрудете се да бидете трпеливи до следното патување и секако, максимално да избегнувате стресни ситуации.