Кражбата, под која најмногу подразбираме џебни кражби, е прилично распространет феномен во лондонското метро, откри новата статистика. Криминалот во метрото се зголемил за 56 отсто севкупно меѓу април и септември оваа година, во споредба со истиот период минатата година, покажуваат податоците на Транспорт за Лондон (TfL), пренесува порталот Euronews.
Кражбите од џебови се зголемени за 83 отсто, а грабежите за дури 107 отсто. И сето тоа и покрај севкупниот пад на бројот на патници за 11 отсто.
„Знаеме како крадците ги таргетираат прометните места, вклучително и нашите мрежи за јавен превоз и тесно соработуваме со полицијата за да се справиме со кражбите“, рече портпаролот на TfL.
Треба да бидете особено внимателни на одредени станици, како што се King’s Cross St Pancras, Leicester Square и Oxford Circus.
Бидете внимателни и ако го посетувате Лондон за време на викендот, бидејќи 55 отсто од кражбите на метро се извршени помеѓу петок и недела. Исто така, избегнувајте ги следните времиња на патување доколку можете: 23 отсто од кражбите се случиле во вечерниот „шпиц“ (од 17 до 20 часот).
Соочени со зголемените стапки на криминал, 32 отсто од жителите на Лондон рекоа дека биле загрижени и непријатно се чувствувале во јавниот превоз во изминатите три месеци – особено во метрото и автобусите.
Пијанството и во двата начина на транспорт беше клучна грижа, особено за патничките. Асоцијалното однесување на младите и училишните деца, особено мажите, е позастапено во автобусите. Пренатрупаноста, заканувачкото однесување и луѓето што питаат се исто така извор на загриженост, според истражувањето на TfL.
Во секој случај, со оглед на ситуацијата, можеме само да препорачаме да ги држите очите отворени и да посветите максимално внимание на работите, доколку патувате во Лондон и сакате да си поминете убаво.