Мини-серијата The Åre Murders пристигна на платформата и има големи шанси да стане ваша нова опсесија.
Заплетот не води во живописен шведски град потресен од мистериозното исчезнување на една млада девојка. Иако серијата пристигна на Нетфликс на 6 февруари, таа веќе го зазеде првото место меѓу најгледаните наслови.
Оваа мини-серија е базирана на популарните книги на шведската авторка Вивека Стен. Таа ја следи полицајката Хана Аландер (Карла Сен), која доаѓа во колибата на нејзината сестра во познатиот ски-центар Аре за да се опорави откако била суспендирана од работата во Стокхолм и раскинувањето со партнерот. Но наместо одмор, ја чека нова мистерија – девојка исчезнала по вечерната забава на Денот на Света Луција, познатиот шведски фестивал на светлата.
Хана не може, а да не се вклучи во случајот и наскоро се приклучува на локалната полиција, работејќи со искусниот детектив Даниел Линдков (Кардо Разази) во потрагата по одговори.
Два случаи во пет епизоди
Ако сакате нордиски криминални приказни, оваа серија е вистинскиот избор за вас. Ги има сите елементи на класичен нордиски ноар – снежен град, непредвидливи пресврти, тајни кои излегуваат на виделина во најнеочекуваните моменти и ликови кои се занимаваат со сопствените проблеми.
Серијата комбинира две книги во пет епизоди, од кои секоја трае меѓу 35 и 55 минути, а овој формат се покажа како хит. Приказната се одвива со динамично темпо, секоја епизода носи барем по едно шокантно откритие, а тензијата постојано се зголемува. Првите три дела формираат посебен наративен лак наречен Скриен во снегот, додека последните два, наречени Скриени во сенките, ја раскажуваат приказната за нов случај на убиство во Аре.
„Се надевам на втора сезона“, „Одлична серија“, „Напната и интересна“, се дел од коментарите на гледачите во Фејсбук групата „Нетфликс Бангерс“.
Со ладна, но убава скандинавска атмосфера, одлични изведби и паметно раскажана мистерија, The Åre Murders е серија која многумина нема да можат да престанат да ја гледаат.