Колачот од лимон е класика на секоја пролетна сезона и е идеален десерт за уживање со шолја чај.
Иако многу слаткарници имаат своја верзија на овој популарен десерт, авторката на популарниот блог „Jane’s Patisserie“, Џејн Дан, го откри својот креативен рецепт за овој колач.
Тајната за подготовка на овој колач лежи во еден додаток на овошје што му дава единствена нота и сочност, а тоа се боровинките. Џејн тврди дека комбинацијата од лимон и боровинки се покажала како хит во многу од рецептите што ги подготвила.
Потребни состојки:
225 грама путер, 225 грама шеќер, 225 грама брашно, 50 грама мелени бадеми, четири големи јајца, кора од два лимона, 150 грама свежи боровинки, 150 грама шеќер во прав и сок од еден лимон
Подготовка:
Загрејте ја рерната на 180 степени. Обложете правоаголен плех за печење со хартија за печење. Во голем сад, изматете го омекнатиот путер и шеќерот додека не добиете лесна и кремаста смеса. Додадете го брашното, мелените бадеми, јајцата и ренданата кора од лимон и повторно мешајте додека состојките не се соединат. Конечно, со шпатула, додадете ги боровинките во смесата, внимавајќи да не ги згмечите. Рамномерно распоредете ја смесата во подготвениот плех и измазнете го горниот дел. Печете во загреана рерна 45 до 55 минути.
Проверете дали колачот е печен со вметнување чепкалка за заби во центарот; ако излезе чиста, колачот е готов. Оставете го печениот колач целосно да се олади во плехот пред да го прелиете со глазурата. За глазурата, измешајте го шеќерот во прав и сокот од лимон во мал сад. Мешајте додека не добиете густа, мазна паста. Прелијте ја глазурата врз изладениот пандишпан. Пред сервирање, можете дополнително да го декорирате колачот со свежа кора од лимон и боровинки. Уживајте во вкусен пролетен десерт.