Речиси три децении по смртта на принцезата Дијана, нејзиниот брат Чарлс Спенсер во своите мемоари открива детали за разговор со принцот Чарлс во врска со нејзиниот погреб.
Додека се наближува 30-годишнината од смртта на принцезата Дијана – настан што следната година ќе биде одбележан во Обединетото Кралство со низа манифестации – нејзиното семејство се навраќа на настаните што му претходеа на погребот.
Во својата книга „Swan Song: Diana, My Sister“ („Лебедова песна: Дијана, мојата сестра“), братот на Дијана, Чарлс Спенсер, пишува дека дошло до сериозен судир меѓу нив за време на разговорите околу тоа дали принцовите Вилијам и Хари – тогаш сè уште момчиња – треба да учествуваат во погребната поворка зад ковчегот на нивната мајка.
Братот на Дијана наведува дека се противел на нивното учество, сметајќи дека тоа искуство би било исклучително тешко за нив. Како што се сеќава, дискусијата прераснала во жесток телефонски разговор со Чарлс.
Спенсер тврди дека за време на разговорот слушнал зборови што особено го шокирале. Како што раскажува во своите мемоари, тогашниот принц, во момент на гнев, му рекол:
„Биди сигурен, набрзо ќе ја заборавиме!“
Братот на Дијана опишува дека бил целосно затечен од таа забелешка. Тој вели дека одговорил оти не може да поверува во она што штотуку го слушнал, а потоа го прекинал разговорот.
Бакингемската палата одби директно да ја коментира содржината на мемоарите. Наместо тоа, истакнаа дека силната тага поради загубата на сакана личност може да влијае врз тоа како луѓето подоцна се сеќаваат на настаните и како ги толкуваат.
Прашањето за учеството на Вилијам и Хари во поворката претходно било предмет на нивни јавни изјави. И двајцата изјавиле дека одлуката била донесена како семеен договор.
Книгата на Спенсер е објавена пред 30-годишнината од смртта на Дијана. Авторот нагласува дека ги претставува настаните од лична перспектива, со цел да понуди сопствено видување за животот на неговата сестра и за драматичните денови што уследиле по нејзината смрт.