Видеото од мачка од Будва, која ги поздравувала минувачите и ги „мамела“ да седнат во еден бар, го привлече вниманието на многу корисници на платформата X и им измами насмевка на лицата.
На оградата во близина на „Freedom Bar“ беше поставен натпис со порака: „Следете ја мачката“. Мачката желно ги очекувала минувачите; кога тие ќе се приближеле, таа ги водела до влезот и скокнувала на масата.
Посетителите биле воодушевени од овој потег. На масата имало и слика од мачката со забавен натпис: „Не сум дебела, едноставно пукам од сексапил“.
Досега, видеото има собрано над 600.000 прегледи и речиси 30.000 допаѓања на X.
„Го тераат животното да работи како лудо! Каде е правдата за мачките?“, „Не ѝ оставивте бакшиш“, „Ако малку ја дресирате, ќе почне и да ги услужува гостите“ и „Ова е преслатко“ се само дел од коментарите.
Големата популација на мачки во Црна Гора – особено во крајбрежните градови како Котор, Будва, Пераст и Херцег Нови – е резултат на комбинација од историски фактори, поволна клима и локални културни традиции:
Како важни трговски и поморски центри на Јадранот, крајбрежните градови во Црна Гора со векови ги пречекувале мачките што пристигнувале со бродовите. Морнарите ги чувале за да ги заштитат залихите на храна од стаорци, а по пристигнувањето во пристаништето, мачките останувале во градот и продолжувале да ја контролираат популацијата на штетници.
Во градовите како Котор, мачките станале неофицијален симбол на градот. Локалното население и туристите редовно ги хранат. Котор е исто така дом на Музејот на мачки, како и на бројни продавници за сувенири посветени токму на овие животни.