Десет години по првата дијагноза на рак, болеста се врати.
Американската пејачка Анастасија (58), која многумина ја паметат по нејзините големи хитови од почетокот на 2000-тите, „I’m Outta Love“ и „Not That Kind“, двапати била дијагностицирана со рак на дојка .
Иако успеа да ја победи болеста и двата пати, нејзиното искуство не заврши со напуштањето на болницата. Пејачката сега се огласи на социјалните мрежи, во разговор со организацијата Breast Cancer Network Australia, за да зборува за предизвиците што можат да останат долго по завршувањето на третманот.
Таа дознала дека има рак на дојка по мамографија, на која докторот ја упатил како дел од тестовите пред планираната операција за намалување на градите. Наместо очекуваните подготовки за процедурата, таа дознала тешка дијагноза за време на прегледот.
„Ракот на дојка промени многу повеќе од здравјето на Анастасија. Го промени нејзиниот однос кон сопственото тело, самодовербата и секојдневниот живот. Во овој искрен разговор, таа зборува за некои од предизвиците што можат да траат долго по завршувањето на третманот“, соопшти организацијата.
На пејачката првпат ѝ беше дијагностициран рак на дојка во 2003 година, во време кога нејзината кариера беше во подем. Поради болест, таа мораше да се повлече од јавноста и да се посвети на лекување. По години борба, таа успеа да се врати на музиката, но десет години подоцна се соочи со нов шок. Во 2013 година, таа дозна дека ракот се вратил, што ја принуди да откаже европска турнеја и повторно да се посвети на своето здравје.
Уште откако првпат ѝ беше дијагностициран рак, таа размислуваше што ќе направи ако се врати. Не се двоумеше долго, и по втората средба со болеста, која за среќа беше откриена во рана фаза, одлучи да направи двојна мастектомија, односно хируршко отстранување на двете дојки.
Низ годините, Анастасија отворено зборуваше за здравствените проблеми низ кои минуваше, а нејзината приказна нè потсетува дека закрепнувањето не завршува секогаш на крајот од терапијата. Болеста може да влијае на сликата за телото на една личност, чувството на самодоверба и многу секојдневни ситуации, дури и откако ќе поминат најтешките периоди на лекување.
Исто така, пејачката живее со неизлечива Кронова болест, хронична воспалителна болест на цревата која ѝ била дијагностицирана на 13-годишна возраст.