Иако неформалните врски често се сметаат за минливи, сериозна романтична врска понекогаш може да се развие од пријателство и повремена интимност.
Истражување спроведено на Универзитетот во Викторија, во кое учествуваа речиси 1.900 испитаници, покажа дека дури 68 отсто од нив ја започнале својата сегашна или последна романтична врска преку пријателство.
Интересно е тоа што кај помладите учесници – оние во своите дваесетти години – оваа бројка достигнува дури 85 отсто, пренесува Vice.
Овие наоди сугерираат дека љубовта често се раѓа од поврзаност која првично немала никакви романтични нијанси. Понекогаш, токму личноста со која сме ги делеле секојдневните предизвици, разговори и искуства, станува личноста со која сакаме да изградиме заедничка иднина.
Пријатели со бенефиции
Сепак, постои разлика помеѓу двајца луѓе кои се зближуваат како пријатели – при што романтичните чувства се појавуваат подоцна – и двајца луѓе кои уште од самиот почеток влегуваат во неформална сексуална врска, со надеж дека таа еден ден би можела да прерасне во нешто повеќе. Џастин Лемлер, истражувач поврзан со Институтот „Кинси“, исто така го проучуваше ова прашање. Заедно со своите колеги, тој во текот на една година следеше 192 лица кои биле вклучени во односи од типот „пријатели со бенефиции“.
Резултатите покажаа дека желбите на учесниците не секогаш се совпаѓале со она што на крајот навистина се случило.
Кога едниот сака повеќе од другиот
За оние кои се надеваат дека еден неформален однос би можел да прерасне во романтична врска, наодите не се особено охрабрувачки. Меѓу испитаниците кои сакале нивниот однос со пријателот да стане посериозен, само 15 отсто успеале да го постигнат тоа.
Од друга страна, оние кои по периодот на интимност сакале да се вратат на чисто платонско пријателство, биле многу поуспешни; 59 отсто од учесниците со таква цел успеале да ја остварат. Со други зборови, враќањето кон пријателство се покажа како поостварливо сценарио отколку преминот од необавезен однос во сериозна врска.
Искрениот разговор може да спречи недоразбирања
Еден од клучните фактори што влијаат врз иднината на ваквите односи е отворената комуникација. Според наодите на Лемилер, поединците кои уште на почетокот разговарале за своите очекувања и поставиле граници, имале поголеми шанси да ја зачуваат својата поврзаност, без оглед на тоа во која насока на крајот се развил односот.
Од друга страна, недостатокот на комуникација и различните сфаќања за природата на односот често доведувале до оддалечување и целосен прекин на контактот. Проблемот настанува кога двајца луѓе немаат исти желби, но за тоа молчат. Додека кај едниот може да се појават подлабоки чувства и визија за заедничка иднина, другиот може да биде сосема задоволен од повремени средби без никакви обврски.
Затоа е важно да не се потпирате само на претпоставки или на толкување на ситни гестови. Колку и да е непријатен разговорот за чувствата, многу подобро е уште на почетокот да разјасните на што сте, отколку со месеци да чекате работите да се променат.
На крајот на краиштата, односот „пријатели со бенефиции“ секако може да прерасне во љубов; сепак, самиот факт дека сте блиски и чувствувате взаемна привлечност не значи нужно дека и двајцата го посакувате истиот исход.