Занимавањето со хоби е корисно за менталното и емоционалното здравје; психолозите истакнуваат дека придобивките за долговечноста се уште поголеми кога редовно се занимавате со хоби во друштво на други луѓе.
Активностите како читање, градинарство, печење колачи или плетење се корисни дури и кога се извршуваат сами, објаснува психологот и истражувач Мери Кетрин Мекдоналд.
„Кога сме под стрес, значителен дел од протокот на крв и електричната активност се насочуваат кон центарот за страв во мозокот, кој потоа му сигнализира на остатокот од телото дека сме во опасност“, вели Мекдоналд.
Ова доведува до зголемување на хормоните на стрес, анксиозноста и воспалителните процеси. Според Мекдоналд, хобијата силно го активираат префронталниот кортекс, пренасочувајќи ја активноста подалеку од центарот за страв – што, пак, го запира испраќањето сигнали за опасност.
„Кога се занимаваме со хоби, ние буквално го преобликуваме нашиот мозок“, истакнува таа.
Психологот д-р Наташа Тапар-Олмос наведува дека постојат цврсти докази оти поддржувачките социјални односи го подобруваат здравјето преку влијание врз хормоните, регулирање на парасимпатичкиот нервен систем и намалување на воспаленијата. Комбинирањето на хоби со дружење, објаснува таа, ги обединува придобивките од двете: пониски нивоа на кортизол, зголемено ниво на допамин и повеќе позитивни емоции, пренесува Real Simple.
Мекдоналд додава дека споделувањето хоби го намалува притисокот при дружењето. На пример, во клуб за читање книги, не мора сами да смислувате теми за разговор – едноставно можете да разговарате за книгата. Тапар-Олмос нагласува дека долгите разговори не се ни неопходни.
„Самото присуство во ист простор со други луѓе кои уживаат во истата активност може да ги зголеми придобивките од самото хоби“, вели таа. Конзистентноста е поважна од зачестеноста; нема потреба од одреден број состанување неделно – важно е редовно да поминувате време со други луѓе во текот на подолг временски период.
За почетниците, Тапар-Олмос препорачува посетување еднократна работилница или придружување на пријател кој веќе има хоби – како што е играње тенис или сликање со водени бои – при што советува да се ослободите од перфекционизмот. Мекдоналд, исто така, предлага и обратна варијанта: поканете пријател да ви се придружи во активност што веќе ја практикувате сами, како што се планинарењето или готвењето.