Љубителите на собни растенија сè повеќе се свртуваат кон природни методи за нега, а еден ефикасен сојузник може да се најде токму во кујната. Мелениот цимет помага во борбата против габи, мувла и ситни штетници – и тоа без употреба на агресивни хемикалии.
Експертите за градинарство, консултирани од порталот „Марта Стјуарт“, истакнуваат дека циметот е евтино и нетоксично решение. Криси Хендли од компанијата Online Turf напоменува дека тој не им штети на корисните инсекти и не ја загадува почвата, додека неговиот силен мирис ги одбива штетниците.
Зошто циметот е ефикасен
Циметот содржи цинамалдехид – соединение кое му ја дава карактеристичната арома и поседува антигабични и антибактериски својства. Хендли додава дека ова помага почвата да остане поздрава; штетниците, од друга страна, обично се привлечени од почва што е премногу влажна или зафатена со мувла.
Како да го користите
Мувла на почвата: Појавата на бела мувла на површината на почвата е честа појава во зима, најчесто како последица на прекумерно наводнување. Во такви случаи, едноставно посипете тенок слој мелен цимет врз површината. Ако мувлата веќе се проширила, Хендли препорачува да го изолирате растението, да ја отстраните мувлата, а потоа двапати неделно да го прскате растението со раствор од цимет.
Антигабичен спреј: Хендли подготвува раствор така што меша една лажица цимет во пет литри топла вода, ја цеди течноста низ филтер за кафе и ја става во шише со распрскувач. Таа напоменува дека овој спреј е ефикасен против сива мувла (ботритис) и пепелница.
Ситни мушички и мравки: Ситните мушички, кои ги полагаат јајцата во влажна почва, не го поднесуваат мирисот на циметот. Кога ќе се посипе врз површината на почвата во саксијата, циметот ги одбива штетниците и го забавува растот на габите со кои се хранат нивните ларви. Оваа постапка треба да се повторува приближно на секои две недели; доколку растението е нападнато од штетници што го цицаат сокот, циметот може да се нанесе и директно на листовите.
Исеченици и оштетувања: При кроење, или доколку случајно се скрши лист или стебло, на свежиот пресек може да се стави малку цимет; тоа ја затвора раната и ја штити од бактерии и габи. Работи што треба да ги имате предвид
За растенијата користете чист, мелен цимет (добиен од кората) – никогаш мешавина што содржи шеќер, предупредува Линдзи Частејн од „The Waddle and Cluck“. Се препорачува цејлонски цимет, бидејќи циметот од типот „касија“ може да биде донекаде штетен за растенијата доколку се користи во поголеми количини.
Важно е да не претерате со количината. Муталик предлага циметот да се нанесува со помош на сито со ситни отвори.
„Штом ќе забележите дека циметот се згрутчува или создава кора на површината на почвата, значи дека сте ставиле премногу“, вели тој.
Дебелиот слој ќе ја одбива водата, ќе го отежне наводнувањето, па дури може и да поттикне појава на мувла.