10 маркетинг идеи кои го променија светот
Креативност, идеја, ризик! Тоа им е најпотребно на претставниците од маркетингот. Ако погледнеме 100 години наназад, лесно ќе забележиме дека клучот на успехот лежи во комбинација од вистинска доза креативност надополнета со интересна приказна. Некои идеи направија комплетен пресврт во маркетингот. Ви претставуваме некои од нив. Многумина сметаат дека маркетингот не е ништо друго освен продавање и рекламирање. Во секојдневното бомбардирање со безброј рекламни кампањи “обичните” луѓе тешко препознаваат квалитетни рекламни кампањи. Ескепртите од таа област, пак, ќе речат дека вистински успех можат да постигнат само оние кампањи кои ефективно ќе ја остварат својата цел, односно ќе остварат успешна комуникација со избраната целна група.
Капитал направи избор на 10 идеи за маркетинг кои направиле пресврт во маркетинг-концептот и со децении ги инспирираат претставниците за маркетинг, кои денес имаат голем избор на технолошки “алатки” со чија помош можат да станат маркетинг-иноватори на наредниот век.
1. Вудбури (Woodbury) козметичка компанија, основана во 1870 година од страна на Џон Х. Вудбури- дерматолог од Албани, државата Њујорк
Во 1911 година, во индустријата за рекламирање доминираше машкиот пол. Маркетингот кој тие го продуцираа беше насочен кон стимулирање на производството, наместо кон потребите на потрошувачите. Тогаш се појави Хелен Лансдаун, која застана на чело на новоформираниот едиторијал за жени Џ. Волтер Томпсон (J. Walter Thompson) и ги предизвика тогашните норми. Таа му го промени фокусот на одделот за маркетинг на Вудбури, пренасочувајќи го на потрошувачите и на нивните потреби, со реклами на кои беа претставени елегантни млади дами кои уживаат во љубопитните погледи на младите џентлмени. Кампањата што Лансдаун ја лансираше за сапунот Вудбури – “Skin you love to touch” – “Кожа што сакате да ја допирате”, од страна на маркетинг-историчарите се смета за прва модерна рекламна кампања која употребила сексапил.
2. Бурма шејв (Burma Shave)- Американска бренд-пена за бричење, производ на компанијата Бурма вита
Во раните години на автомобилизмот, Клинтон Одел произведе крем за бричење за кој не е потребна употреба на четка. Одел имал прекрасен и иновативен продукт, но немал специфичен маркетинг-план. Неговиот син Алан во 1925 година дошол до идеја да постави последователни знаци покрај патиштата на кои ќе бидат испишани едноставни, но интересни реченици. Татко му не бил премногу воодушевен од идејата, но му дал 200 долари за да ја испроба својата идеја близу Минеаполис. Ефектот бил фантастичен. Знаците ги воодушевувале моторџиите, трговците и обичните патници. Поставени биле скоро 7.000 знаци на кои биле запишани 600 стихови, повеќето од нив биле следени од потрошувачите на јавен годишен натпревар. Со оваа кампања, за една декада, Бурма шејв стана втор најпопуларен крем за бричење во САД.
3. Легс (L’eggs) – популарен бренд за хулахопки на корпорацијата Хајнс
Во 1969 година, дизајнерот Роџер Феритер од студиото Херб лубалин асосиејтс (Herb Lubalin Associates) во Њујорк, не можел да се помири со тоа што неговата работа не била доволно креативна, па едно утро додека имал презентација за новиот производ на Хајнс, поточно за нивните хулахопки со пониска цена, решил за последен пат да го испита производот. Во еден момент кога тој ги стегнал хулахопките во неговата дланка за да види колку компактен може да биде производот, ја добил идејата дека амбалажата може да биде во облик на јајце. Тој сфатил дека egg се римува со leg, а со додавање на специфичното француско Л, производот го нарекол едноставно L’eggs. Почетните цртежи ги направил веднаш, а останатото е веќе историја.
4. Авис (Avis) – компанија за изнајмување возила
Кампањата на Авис- “Ние сме број 2, се трудиме повеќе” (We’re No.2. We try harder) ги прекрши сите правила. Со овој слоган, Авис призна дека губат пари, дека им се намалуваат потрошувачите и дека се втори, после Херц (Hertz). Тест резултатите од маркетинг-агенцијата Дојл Ден Баренбах (Doyle Dane Barnebach), биле толку сиромашни што никој во адвертајзингот денес не би си дозволил да излезе со таков слоган. Но, Боб Таунсенд верувал во овој слоган, бидејќи знаел дека ги изразува желбите на менаџментот за да бидат различни, ефективни и извонредни на пазарот.
Скоро 40 години подоцна, овој слоган е сe уште актуелен и присутен во рекламирањето, а за Авис- тој е веќе есенцијален.
5. Бенетон ги соединува луѓето
Во 1965 година, четворица браќа од Тревисо, Италија, ја стартуваа сега веќе добро познатата интернационална модна империја- Бенетон. Во 1984 година, рекламирајќи се само во Италија и Франција, тие дошле до идеја, фокусирајќи се на глобалниот апел за хармонија меѓу расите и мир во светот, да ја лансираат кампањата “Сите бои на светот”. Во 1989 година, интензивната соработка помеѓу Лучијано Бенетон и фотографот Оливио Тоскани, произведе храбра и поразлична кампања од другите. Неприкажувајќи ги сопствените производи на фотографиите, “Обединетите бои на Бенетон” поставија симболични мултиетнички фотографии кои почнаа да ги уриваат бариерите помеѓу луѓето. После оваа кампања, етничката различност и денес претставува обврска на Бенетон.
6. Фолксваген битл (Volkswagen Beetle)- познатата германска “буба”, се проби на американскиот пазар едноставно кажувајќи ја вистината
Што би направиле, доколку би биле на местото на Дојл Ден Бернбах и го промовирате малиот и грд европски автомобил кој се натпреварува со преценетите, мачо-американски суперхерој автомобили? Многу едноставно. Се повикувате на негативните вистини за вашиот автомобил: не е голем, прекрасен и брз; па потоа, помалку срамежливо ги вметнувате позитивните страни: не “јаде” многу гориво и гуми и не бара голем простор за паркинг и високи осигурителни премии.
Со преобразувањето на негативните во досетливи позитивни страни, Бернбах предизвикал, влијателна маркетинг-кампања која ја направи “бубата” најпродавано увезено возило во САД, со што го докажа и сопствениот слоган “Think small”.
7. Амбалажата на вотката “абсолут” говори за брендот
Кога Ларс Линдмарк, генералниот менаџер на шведскиот Вајнс енд спиритс (Wines and Spirits), се здружи со Гунар Бруман, еден од претставниците за маркетинг на Стокхолм, со цел да креираат алкохолен пијалак за извоз, Бруман го позајми името Абсолут пјур вотка (“Absolut Pure Votka”) кој е поевтин бренд. Како инспирација за амбалажата му послужија аптекарските шишенца од 19-ти век. Игнорирајќи ја опозицијата од арт-директорите, раководителите на компаниите кои произведуваат алкохол и фокус-групите, Линдмарк започна со производство. Дизајнот на шишето сам по себе станал движечка маркетинг-сила за “абсолут”. Лансиран во 1979 година, “абсолут” беше број еден увезена вотка по продажба во 1985.
8. Ејпл(Apple) со само една телевизиска реклама го воведе Мекинтош на пазарот
Рекламата “1984” му го претстави Мекинтош на светот за првпат.
Оваа реклама беше прикажана еднаш за време на третата четвртина на Супер Боул купот во 1984 година во САД. Спотот, режиран од познатиот режисер Ридли Скот, го претстави Мекинтош како спасител на човештвото од еднобразноста. Изненадувачки за овој период од рекламирањето е тоа што компјутерот на Ејпл се спомнува само еднаш. Бордот на директори не го прифатил овој спот после првото гледање. Но, кога Стив Џобс и Џон Скули побараа дозвола за прикажување, на крајот бордот попушти, што се покажа како правилен потег во тој момент.
9. Логото на Најк чини само 35 долари
За едно од најпознатите логоа на светот, Најк има многу скромни почетоци. Во 1971 година Каролајн Дејвидсон, студентка по графички дизајн на универзитетот во Портланд, се сретна со Фил Најт атлетичар и професор по сметководство на Универзитетот во Орегон. Фил и неговиот тренер Бил Бауерман имале потреба од лого за новата линијата атлетски обувки. Својот производ го именувале Најк според грчката божица на победата. За 2 долари на час тие ја најмиле Дејвидсон да дизајнира лого за нив. Инспирирана од крилото на познатата грчка божица, таа го направила логото за цена од 35 долари.
10. Бургер Кинг доминира на пазарот со своето “покорно пиле”
Ветувањето на брендот “Нека биде по Ваше” создаде ново мислење во 2004 година со кампањата ”Subservient chicken”. Лансирајќи нов средно крцкав пилешки сендвич, претставниците за маркетинг на Бургер Кинг ја таргетираа младата популација со алтернативна маркетинг- кампања.
Решението на Crispin Porter & Bogusky’ s беше отворање интерактивна интернет-страна на која е прикажано пиле кое ќе може да ги направи сите команди кои ќе му ги поставите.
Резултатите беа вчудовидувачки- милион посети на ден, 20 милиони во првата недела, 369 милиони во првата година, просек од 6 до 7 минути потрошени на веб-страната и секако, пораст на продажбата за 9% неделно.
Извор: статијамк