Се работи за уште еден неуспех на Словенија откако Кетрин Ештон минатата година ги одби словенечките кандидати за водечките дипломатски позиции. Словенија овие денови губи една од најважните позиции што моментално словенците ги држат во ЕУ- генерален директор за правда и внатрешни работи во Советот на Европа, каде од 2004 година ова место го има словенецот Иван Бизјак.
Како што јавуваат словенечките медиуми, цитирајќи извори од Брисел, донесена е одлука Бизајк предвремено да се пензионира.
Позицијата генерален директор за правда и внатрешни работи во Советот на Европа, е една од осумте такви позиции и втора најважна позиција во рамките на ЕУ, веднаш по позицијата европски комесар за животна средина, која ја држи Јанез Поточник.
Но, за разлика од позицијата на Бизајк, позицијата на комесар во Европската комисија е гарантирана со европски договор, каде секоја членка на ЕУ има по еден претставник.
Интересно, одлуката за предвремено пензионирање на Бизјак ја донесе генералниот секретар на Советот на Европа, Пјер де Боисеј, и тоа во момент кога и тој заминува од својата висока должност, на која ќе го замени германецот Уве Корсепиус.
Иако мандатот на директори не е временски ограничен, вообичаено е пензионирање со 65 години, додека Бизјак има десет години помалку.
Сепак, неговото предвремено пензионирање, според Брисел не е дисциплинска санкција. Бизјак, поранешен словенечки миснитер за внатрешни работи и народен правобранител за човековите права, на тековната позиција го назначи Хавиер Солана, кој во 2004 година беше генерален секретар во Советот на Европа.
Според неофицијални информации на оваа позиција ќе го замени сегашениот негов заменик, шпанецот Рафаел Фернандез Гонзалес-Пита.
Со заминувањето на Бизјак, словенците веќе нема да имаат позиција на генерален директор, додека еден словенц останува на пониска позиција, заменик генерален директор, а тројца на уште пониски раководни позиции.