Македонија од почетокот на месецот бележи зачудувачки пораст на нови случаи на корона вирус, и кога бројот на новозаразени стана поголем отколку во екот на епидемијата, владата беше принудена да го врати назад полицискиот час. Оваа земја во никој случај не е единствен ваков случај – слично сценарио се случува деновиве низ целиот свет, како што и предупреди Светската здравствена организација (СЗО).
Бројот на нови случаи КОВИД-19 во светот минатата недела се зголеми побрзо од кога било досега, со дневно глобално зголемување од над 100.000. Додека во април бројот на новозаразени никогаш не достигна 100.000 за еден ден, од 21 мај, дневното зголемување е помало од тој број само пет пати, а на 3 јуни достигна 130.400.
Зачудувачкиот раст кулминираше во неделата, кога во еден ден во светот беа регистрирани рекордни 136.000 нови случаи, додека вкупниот број заразени надмина седум милиони.
-Скоро 75 проценти од вчерашните случаи се од 10 земји, претежно во Северна и Јужна Америка и Јужна Азија – рече во понеделникот директорот на СЗО, Тедрос Аданом Гребрејзус, додавајќи дека бројот на нови случаи е зголемен во африканскиот регион, каде вирусот се јавува во нови области.Тој изјави дека е забележано зголемување на бројот на нови случаи во одредени делови на Источна Европа и Централна Азија, додека стапката на инфекција го продолжува својот постојан раст во тековно најголемите жаришта како што се Бразил и Индија.
Македонија забележа дури 127 нови случаи за еден ден, што претставува зголемување повисоко од средниот први пандемиски бран кон средината на април, кога рекорд беа 101 новозаразени лица. Вкупниот број на заразени во Македонија достигна 3.152, од кои 1.653 оздравени и 156 починати.
Министерот за здравство Венко Филипче предупреди за нов бран во земјата, обвинувајќи ги граѓаните за непочитување на пропишаните мерки за физичко растојание, што беше особено видливо за време на одбележувањето на верскиот празник Бајрам на 24 мај.
– Собир на граѓани на семејни вечери, неносење заштитна опрема, непочитување на мерките и други слични престапи, се главните причини за брзиот раст на бројот на нови пациенти во Скопје, Куманово-Липково, Тетово со околните општини, Штип и околината – рече Филипче.