Оваа земја седма година по ред е најсреќната земја во светот

Финска го обезбеди првото место меѓу најсреќните земји во светот и ја освои таа титула седма година по ред!

Токму тоа го кажува извештајот на Мрежата за решенија за одржлив развој, спонзорирана од ОН, објавен оваа недела.

Просечниот рејтинг на таа нордиска земја е 7,7, потоа следат Данска, Исланд и Шведска, а на другиот крај од скалата е Авганистан.

За прв пат по повеќе од 10 години, САД и Германија не се меѓу првите 20 најсреќни нации, паѓајќи на 23-то и 24-то, соодветно, додека Франција го зазеде 27-то место.

Во првите 20 се најдоа Костарика и Кувајт, кои ги зазедоа дванаесеттото и тринаесеттото место, а меѓу првите 20 земји нема ниту една најнаселена земја во светот.

„Меѓу првите десет, само Холандија и Австралија имаат повеќе од 15 милиони жители, а во првите дваесет само Канада и Обединетото Кралство имаат повеќе од 30 милиони“, се вели во извештајот.

Најголем пад на индексот на среќа од 2006 до 2010 година има Авганистан, Либан и Јордан, а најголем пораст имаат Србија, Бугарија и Латвија.

Годишниот извештај на Светскиот индекс на среќа, започнат во 2012 година за поддршка на Целите за одржлив развој на Обединетите нации, се заснова на податоци од американската компанија за истражување на пазарот Gallup и е објавен од Мрежата за решенија за одржлив развој на Обединетите нации. Се заснова на проценката на луѓето за нивната среќа, како и податоци за економските и социјалните услови.

Од жителите на 143 земји и региони се бара да го оценат своето задоволство од животот на скала од нула до 10. Извештајот, исто така, зема предвид шест клучни фактори: социјална поддршка, личен доход, здравје, слобода, дарежливост и отсуство на корупција.

Во поширока смисла, рангирањето е во слаба корелација со просперитетот на земјата, но се чини дека и други фактори како што се животниот век, социјалните врски, личната слобода и корупцијата влијаат и на проценката на поединците – пишува  Novi list .

Близината до природата и добрата рамнотежа помеѓу работата и приватниот живот се клучот за среќата за Финците, изјави за Франс прес Џенифер Де Паола, истражувач специјализиран за оваа тема од Универзитетот во Хелсинки.

Финците имаат различни приоритети кога станува збор за концептот за успешен живот, во споредба со, на пример, САД каде успехот често се поврзува со финансиска добивка, додава Де Паола.

Довербата во институциите, ниското ниво на корупција и слободниот пристап до здравството и образованието се исто така важни. Дополнително, Де Паола истакнува дека „финското општество е проткаено со чувство на доверба, слобода и високо ниво на автономија“.