Ридот на крстови: Моќно и волшебно место со бурна историја

Kryžių kalnas или Ридот на крстовите е место за аџилак, кое се наоѓа на околу 12 километри северно од градот Шијаулиаи во Литванија. Станува збор за место со „море“ од крстови, чиј точен број не е познат, но се проценува дека во 2006 година ги имало повеќе од 100.000.

Потеклото на овој обичај е непознато, но приказната вели дека првите крстови биле поставени по востанието во 1831 година. Имено, на крајот на 18 век, по 3-та поделба на Полско-литванскиот Комонвелт, Литванија станала дел од Руската империја, и покрај противењето на сопственото и полското население. По неуспешните востанија, на овој рид почнале да никнуваат крстови.

Протест со крстови

Семејствата на исчезнатите бунтовници не можеле да ги најдат телата на своите најблиски, па почнале да поставуваат симболични крстови на местото на поранешната тврдина. По распадот на Руската империја во 1918 година, Литванија ја прогласи својата независност и ова стана место за молитва за мир, земја и за оние изгубени за време на војните.

Меѓутоа, за време на советската окупација на земјата од 1944 до 1990 година, Литванците продолжија да поставуваат крстови во знак на протест против Русите, кои ги преместиле крстовите и ја уништиле областа со булдожер.

Денес луѓето можат слободно да поставуваат крстови на тој рид.