Секојдневните грешки можат да го зголемат нивото на шеќер во крвта.
Храната не е единствената причина за високо ниво на шеќер во крвта. Кога размислувате за ова, веројатно прво ви паѓа на ум количината на слатки што ги консумирате. Внесот на јаглехидрати игра значајна улога во нивото на шеќер во крвта, без разлика дали тие јаглехидрати потекнуваат од овошје, житарки или слатки. Сепак, тие не се единствените фактори што влијаат на нивото на шеќер во крвта. Одредени навики – кои не се поврзани со храната – исто така влијаат на тоа како телото го регулира шеќерот.
- Стрес
Кога сте под стрес, вашето тело ослободува хормони како што се адреналин и кортизол. Ова ослободување ја зголемува будноста и производството на енергија, предизвикувајќи нагло покачување на нивото на шеќер во крвта – скок кој всушност е пожелен во краткорочни, стресни ситуации, бидејќи обезбедува будност и енергија потребни за справување со предизвикот. Штом ќе исчезне изворот на стрес, нивото на хормони се враќа во состојба на мирување и се воспоставува рамнотежа. Проблемот настанува кога стресот е постојано присутен во вашиот живот. Според mindbodygreen, хронично високите нивоа на кортизол можат да доведат до хронично покачено ниво на шеќер во крвта.
- Недостаток на сон
Недостатокот на сон, исто така, може да предизвика зголемување на нивото на кортизол во текот на денот – што доведува до повисоки нивоа на гликоза – и да ја наруши способноста на телото ефикасно да го намали високиот шеќер во крвта. Понатаму, недоволниот сон може да ги поремети хормоните за глад, поради што често чувствувате поголем глад во текот на денот доколку не сте се наспале добро претходната ноќ. Се препорачува спиење од 7 до 8 часа секоја ноќ.
- Недостаток на физичка активност
Седентарниот начин на живот – или недостатокот на редовно движење – исто така се поврзува со покачено ниво на шеќер во крвта. На мускулите им е потребна енергија за движење за време на вежбањето, па тие ја користат гликозата од крвта како гориво. Во 2022 година, истражувачите открија дека одењето – па дури и само стоењето – во траење од 2 до 5 минути, еден до два часа по оброкот, е доволно за значително да влијае на нивото на гликоза во крвта. Поинтензивното вежбање има уште поголем ефект.
- Времето на јадење
Важно е и кога јадете. Метаболизмот е поактивен наутро, што значи дека телото е подобро подготвено да ја разгради храната и да ја искористи гликозата од крвта. Кога јадете доцна навечер, непосредно пред спиење, на телото му е потребно повеќе време за да ја преработи гликозата.