Продукцијата на новата ТВ серија за Хари Потер ги засили безбедносните мерки откако еден од актерите доби закани со смрт, потврди извршниот директор на HBO, Кејси Блојс.
Актерот Папа Есиеду, кој беше избран за улогата на професор Снејп, рече дека добил расистички пораки и закани со смрт преку интернет по објавувањето на кастингот.
Блојс рече дека ваквите реакции, иако загрижувачки, делумно биле очекувани со оглед на страствената база на обожаватели на големите франшизи.
- За проекти како овој, однапред подготвуваме тимови и упатства за однесување на социјалните медиуми, а имаме и сериозен тим за безбедност – изјави тој за Variety.
Есиеду нагласи дека, иако не верува дека заканите ќе се остварат, ваквите искуства оставаат емоционални последици.
- Никој не треба да поминува низ ова за својата работа. Јас само играм волшебник, но сепак ме погодува – рече актерот, пренесува Танјуг.
Серијата, базирана на книгите од авторката Џ. К. Роулинг, моментално е во продукција, а премиерата е закажана за 2027 година.
Во новата адаптација глуми Доминик Меклафлин, додека Арабела Стентон ја игра Хермиона Гренџер, а Аластер Стаут го игра Рон Визли.
Ник Фрост како Хагрид, Џон Литгоу како Дамблдор и Папа Есиеду како професор Снејп се појавуваат во други улоги.
Извршниот директор на HBO, Кејси Блојс, претходно изјави дека новата серија ќе обезбеди подетален третман на секоја од седумте книги, при што секоја сезона е планирано да следи по еден роман од серијата. Авторот на серијата за момчето волшебник е вклучен во проектот како извршен продуцент. Актерот Даниел Редклиф, кој го играше Хари Потер во филмската франшиза, им посака среќа на новите актери.