Ненаселеното островче Стронгило, кое се наоѓа во грчкиот архипелаг Додеканези, е ставено на продажба за пет милиони долари, пренесува „Greek Reporter“.
Островот се продава преку специјализирана платформа за продажба на острови, а во огласот се наведува дека тој претставува можност за изградба на приватен имот или луксузно еко-одморалиште.
Стронгило зафаќа површина од приближно 21,9 хектари и се наоѓа северно од островот Липси, во рамките на групата острови Аркиои, во близина на Патмос и Лерос. До него може да се стигне само по морски пат, со приватно пловило или водно такси. Најблискиот аеродром се наоѓа на Лерос, од каде што има летови до Атина.
Според огласот, островот е главно недопрен и располага со три природни плажи. Најголемата од нив е заштитена песочна плажа, долга околу 110 метри. На островот има и камени остатоци од стара куќа, бунар и природен извор на вода; исто така, постои можност за приклучување кон електричната мрежа на соседното островче, Маратос.
„Greek Reporter“ напоменува дека огласот не гарантира одобрување за каква било градба, бидејќи секој проект подлежи на прописи за просторно планирање и соодветни дозволи. Низ историјата, Стронгило служел како засолниште за морнарите за време на невреме.
Островот привлече меѓународно медиумско внимание во 2015 година, кога разни грчки и странски медиуми – повикувајќи се на агенција за недвижности – објавија дека Џони Деп го купил за 4,2 милиони евра. „Greek Reporter“ наведува дека во моментов не е јасно кој е сопственик на островот, ниту дали Деп има некаква поврзаност со него.