Болката за време на овулацијата, позната како mittelschmerz, може да трае од неколку минути до неколку дена и се јавува кај многу жени во средината на менструалниот циклус.
Тоа е медицинското име за болка при овулација, која најчесто се јавува приближно 14 дена пред менструацијата. Како што објасни докторката Хина Гауер за Metro, непријатноста може да се почувствува како тапа болка или како ненадејни, остри убоди, обично само на едната страна од долниот дел на стомакот.
Според експертите, болката се јавува кога фоликулот што ја содржи јајце клетката се истегнува и пука за да ја ослободи. Локацијата на болката зависи од тоа кој јајник ја ослободува јајце клетката тој месец, а понекогаш може да има мало вагинално крварење или исцедок поради промени во нивото на естроген.
Иако овој симптом често се доживува како необјаснива непријатност, проценките покажуваат дека до 40 проценти од жените во репродуктивна возраст го доживуваат секој месец. Во повеќето случаи, трае неколку минути, но кај некои жени, благата непријатност може да трае до два дена.
Лекарите велат дека болката при овулација обично не е загрижувачка, но предупредуваат дека не треба автоматски да ја припишувате на секоја болка во средината на циклусот. „Лесно е да се помеша оваа состојба со други причини за слична болка“, вели Гауер.
Тие вклучуваат ендометриоза, цисти на јајниците, лузно ткиво од карлична операција и сексуално преносливи инфекции како што е хламидија.
Ако болката е блага, лекови против болки што се продаваат без рецепт, топла бања или грејна подлога обично можат да помогнат. Во потешки случаи, вашиот лекар може да препорача орални контрацептиви за да се спречи овулацијата или да ве упати на понатамошно тестирање ако се сомневате на друга причина.