Ако мислите дека е потребно многу за да се направат промени, се лажете себеси. Се почнува со мали нешта, навиките се стекнуваат чекор по чекор, и тоа е единствениот вистински начин да се истрае во нив.
Не мора да поминувате часови на лента за трчање или да следите строги диети за да го продолжите животот. Новите истражувања покажуваат дека дури и малите дневни промени поврзани со спиењето, исхраната и физичката активност можат да го продолжат животот и да го подобрат неговиот квалитет.
Секоја година си ветуваме дека ќе вежбаме повеќе, ќе се храниме поздраво и ќе живееме подобар живот. Но, дали вистинските резултати се постигнуваат со правење радикални промени, или со преземање мали, значајни чекори?
Австралиските научници од Универзитетот во Сиднеј го проучувале однесувањето на повеќе од 59.000 возрасни лица користејќи ја Британската биобанка и откриле дека дури и малите подобрувања можат да имаат значително влијание врз долговечноста и здравјето.
Како малите, здрави промени можат да ви го продолжат животот?
Спиење
Една студија покажа дека луѓето кои спијат околу 5,5 часа навечер можат да додадат една година на својот животен век ако спијат најмалку 25 минути повеќе секој ден. Дури и дополнителни 5 минути сон на ден можат да имаат позитивен ефект.
Совет: Обидете се да си легнете малку порано или да дремнете кратко во текот на денот.
Физичка активност
Само 1,9 минути умерено вежбање на ден може да ви го продолжи животот за околу една година кога се комбинира со други здрави навики. Позначајно зголемување, до 25 минути на ден, може да ви го продолжи животот до 10 години.
Совет: Изберете едноставни движења како одење, вежби со телесна тежина или танцување на вашата омилена музика.
Исхрана
Истражувачите развија скала за квалитет на исхраната од 0 до 100. Додавањето половина порција зеленчук или 1,5 порции интегрални житарки на ден го зголемува овој резултат и го продолжува животниот век. За оние кои сакаат да ги продолжат своите години без болести, доволно е да додаваат една чаша зеленчук, порција интегрални житарки или две порции риба дневно.
Совет: Не плашете се да замените еден вид на храна со поздрава варијанта; малите промени имаат големи бенефити.
Синергија на здрави навики
Комбинацијата од сон, вежбање и здрава исхрана не само што може да додаде една година во вашиот живот, туку и неколку здрави години без кардиоваскуларни заболувања, дијабетес тип 2, деменција и рак. Дури и минималните подобрувања во сите три области даваат резултати што е тешко да се постигнат поединечно.
Секое дополнително парче зеленчук, минута одење или дури 10 минути дополнителен сон се брои. Малите чекори прават голема разлика, бидејќи вистинското здравје и долговечност се раѓаат од едноставни секојдневни одлуки, а не од крајности.