Иако хартиените крпи се корисни во кујната, постојат три ситуации во кои никогаш не треба да ги користите.
Според The Simply, хартиените крпи често имаат и други намени освен бришење раце и впивање истурени течности; сепак, кулинарските експерти советуваат дека нивната употреба за одредени задачи може да донесе повеќе штета отколку корист. Еве три ситуации во кои треба да избегнувате користење хартиени крпи.
Цедење на вишокот течност од рендан зеленчук
При подготовка на јадења што вклучуваат рендан зеленчук – како на пример тиквички – некои луѓе посегнуваат по хартиена крпа. Сепак, штом се намократ, хартиените крпи лесно се кинат под притисок, а храната се лепи за нивната површина, оставајќи парчиња од хартиените влакна во зеленчукот. Наместо тоа, се препорачува да користите чиста кујнска крпа или неколку слоеви газа.
Цедење течности како што се бујони и сокови
Хартиените крпи не се вистинскиот избор за цедење бујони, сокови, одредени видови џем, масла со лута пиперка или ладно приготвено кафе.
Тие брзо се распаѓаат во течноста, се кинат и испуштаат влакна во храната. Наместо хартиени крпи, обложете ја цедалката со газа или муслин, или пак користете сито со ситни отвори.
Обложување на фритезата на топол воздух (air fryer)
Користењето хартиени крпи за обложување на фритезата на топол воздух претставува безбедносен ризик. Силната циркулација на жежок воздух може да ја повлече хартијата кон грејниот елемент, создавајќи опасност од пожар.
Дополнително, хартијата го попречува протокот на воздух и влијае на рамномерното готвење. Наместо тоа, се советува користење на специјални кеси за фритези, при што треба да се напомене дека никогаш не смее да се користи восочна хартија или алуминиумска фолија.