Внесувањето доволно течности е една од најдобрите работи што можете да ги направите за вашето здравје, поради што здравствените експерти често зборуваат за тоа колку вода треба да пиете дневно и како да ја постигнете таа цел. Но, дали е важен начинот на кој ја пиете водата? Дали е подобро да пиете полека, со мали голтки, или да ја испиете наеднаш?
Брзото пиење на големи количини вода може да изгледа како најбрз начин за хидратација, особено кога сте жедни – но брзината со која пиете може да влијае на тоа како вашето тело реагира.
Здравствените експерти ги објаснија разликите помеѓу пиењето со мали голтки и брзото пиење на големи количини, како и тоа дали едниот пристап е подобар за хидратација.
Што се случува кога пиете со мали голтки наспроти брзо пиење на големи количини
Кога внесувате вода, без оглед на брзината, основниот процес останува ист, вели Лорен Манакер (Lauren Manaker), регистриран диететичар во „Nutrition Now Counseling“, во изјава за MarthaStewart.com.
Фотографија: Shutterstock | Drazen Zigic
„Водата патува до желудникот, преминува во цревата, се апсорбира во крвотокот и помага да се надополнат течностите што телото ги искористило или изгубило“, објаснува Манакер. Оттаму, бубрезите одлучуваат колку вода да задржат, а колку да претворат во урина, забележува таа.
„Главната разлика е во тоа колку брзо пристигнува таа вода“, вели Манакер. Пиењето со мали голтки постепено му обезбедува вода на телото, додека брзото пиење внесува поголема количина одеднаш, истакнува таа. „Ако на телото му е потребна таа вода, тоа сепак може да ја искористи. Ако не му е потребна целата, поголем дел од вишокот може да заврши во урината“, вели Манакер. Разлики помеѓу пиењето со мали голтки и брзото пиење на големи количини
Што значи брзината на пиење за хидратацијата и за потребата од одење во тоалет – и дали воопшто има некаква разлика?
Еве преглед на конкретните разлики, според експертите:
Пиење со мали голтки
Предности: „Една предност на пиењето со мали голтки е тоа што е попријатно и може да помогне во одржување на порамномерна хидратација во текот на денот“, вели д-р Хозе Јакуши (Jose Jakushi), општ лекар во „Kaiser Permanente“ во Јужна Калифорнија. Тоа исто така може да ја намали надуеноста или непријатноста во стомакот што некои луѓе ја чувствуваат кога брзо пијат големи количини, додава тој. Дополнително, кога пиете со мали голтки, помала е веројатноста дека веднаш ќе мора да брзате кон тоалетот, забележува Манакер. Недостатоци: Кога пиете мали голтки во текот на денот, можеби всушност не внесувате доволно вода – особено ако вежбате, ако е топло или ако сте болни, вели Манакер.
Брзо пиење (на екс)
Предности: Брзото пиење вода може да помогне кога треба брзо да ја надоместите течноста по тренинг или по долги периоди без внес на вода, според Јакуши. „Исто така, може да биде практично за луѓе кои забораваат да пијат вода освен ако не ја испијат одеднаш“, вели Манакер.
Недостатоци: „Сепак, пиењето големи количини премногу брзо може да предизвика надуеност, непријатност во стомакот и почесто мокрење“, вели Јакуши. А ако го правите тоа непосредно пред спиење, поголема е веројатноста да се разбудите поради чести посети на тоалетот. Ова може да ја намали ефикасноста на сонот, што потенцијално води до замор во текот на денот, поспаност и нарушена концентрација и меморија, според Јакуши. Ризици: „Во ретки случаи, прекумерниот внес на вода во краток временски период може да придонесе за опасно ниско ниво на натриум, особено за време на активности на издржливост“, вели Јакуши. (Ова може да доведе до интоксикација со вода, иако, повторно, тоа е ретко.)
Што е подобро за хидратација?
На крајот на краиштата, брзината на пиење е од мала важност и не е главниот фактор, забележува Манакер. „За повеќето луѓе, одржувањето на хидратацијата зависи многу повеќе од вкупната количина на течност консумирана во текот на денот“, вели таа. Важни се и други фактори. Тие вклучуваат ниво на активност, клима, големина на телото, општо здравје, лекови и губење на течности преку потење, болест или вежбање, според Јакуши.
Имајќи го тоа предвид, Манакер вели дека најдобриот пристап обично е едноставен: „Пијте редовно во текот на денот, пијте повеќе кога е топло или кога сте активни и избегнувајте големи количини вода непосредно пред спиење ако ноќните посети на тоалетот ви претставуваат проблем“.
Слично на тоа, Јакуши советува да се користат жедта и бојата на урината како показатели (бледожолтата урина генерално е добар знак, вели тој). „За повеќето луѓе, доследните навики за хидратација се поважни од тоа дали пијат вода во мали голтки или ја пијат на екс“, заклучува тој.