Филмската франшиза Fast and Furious доаѓа на телевизија. Платформата за стриминг „Peacock“ даде зелено светло за продукција на нова играна серија заснована на популарната франшиза, со премиера планирана најдоцна до 2028 година.
Развојот на телевизиската серија првпат беше најавен претходно оваа година, кога Вин Дизел го претстави проектот за време на презентацијата на „NBCUniversal“. Дизел ќе биде извршен продуцент заедно со Сем Винсент („One Race“), Нил Х. Мориц и Павун Шети („Original Film“), како и Џеф Киршенбаум и Крис Морган („Chris Morgan Productions“).
Мајк Даниелс – познат по својата работа на серии како „Sons of Anarchy“, „Shades of Blue“ и „The Rockford Files“ и Вулф Колман ќе бидат извршни продуценти, сценаристи на пилот-епизодата и главни креативни раководители на серијата.
Тие имаат за цел да ја прикажат премиерата на серијата до 2028 година, што ќе се совпадне со објавувањето на новиот филм од франшизата насловен „Fast Forever“. Тој филм е планиран да пристигне во кината на 17 март 2028 година.
„Universal Television“ ќе биде студиото одговорно за продукцијата на телевизиската серија.
Дизел претходно, во мај, зборуваше за својата желба да го прошири светот на „Брзи и бесни“ на телевизија. „Во изминатите десет години, фановите сакаа повеќе. Сакаа да ги прошириме приказните за ликовите и нивните светови. Во текот на последната деценија постоеше желба да се навлезе во телевизискиот простор – сфера што Фалон веќе ја совлада. Морав да го чекам вистинскиот момент… Тој момент дојде кога Дона Ленгли го презеде надзорот, бидејќи тогаш знаев дека интегритетот на ликовите, нивната меѓународна привлечност и она чувство на семејство што допира до сите нас, ќе бидат заштитени и на телевизија“, изјави Дизел.
Тој додаде дека тогаш било објавено оти „Peacock“ започнува со реализација на дури четири серии сместени во универзумот на „Fast and Furious“.
Ова не е првпат франшизата да направи премин кон телевизијата. Во периодот од 2019 до 2021 година, Netflix ја емитуваше анимираната серија „Fast & Furious: Spy Racers“, која се прикажуваше во шест сезони.
Филмскиот серијал „Fast & Furious“ започна во 2001 година со филмот The Fast and the Furious, чие дејство се одвива во светот на уличните трки во Лос Анџелес. Во првиот филм главните улоги ги толкуваа Вин Дизел како Доминик Торето, Пол Вокер како Брајан О’Конер, Џордана Брустер како Миа и Мишел Родригез како Лети; со текот на годините, серијалот прерасна во една од најпознатите филмски франшизи на сите времиња.