„Спајдермен: Сосема нов ден“ надмина 700 милиони долари во продажба на билети во САД, станувајќи филм кој најбрзо го достигна рекордот на бокс-офисот.
Стрип-авантурата на „Сони“ и „Марвел“, во која глуми Том Холанд, досега заработи 704,5 милиони долари во Северна Америка и 1,8 милијарди долари низ целиот свет по само два викенда од прикажувањето.
Интересно е што само седум филмови во историјата достигнале 700 милиони долари во Северна Америка. Листата ги вклучува „Војна на ѕвездите: Силата се буди“ од 2015 година со 963 милиони долари, „Одмаздници: Крајна игра“ од 2019 година со 858 милиони долари, „Спајдермен: Нема пат кон дома“ од 2021 година со 814 милиони долари, „Аватар“ од 2009 година со 785 милиони долари, „Топ Ган: Маверик“ од 2022 година со 721 милион долари и „Црн Пантер“ од 2018 година со 700 милиони долари.
На меѓународно ниво, „Спајдермен: Сосема нов ден“ се искачи на 1,108 милијарди долари, импресивно надминувајќи го вкупниот износ на својот претходник од 1,106 милијарди долари во странство.
„Сосема нов ден“ е веќе најголемиот филм во годината, како и 10-тиот филм со најголема заработка на сите времиња, како на меѓународно така и на глобално ниво.
Откако дебитираше со рекордни 355 милиони долари во Северна Америка и неверојатни 932 милиони долари на глобално ниво, ја премина границата од 1 милијарда долари за само шест дена и брзо се приближува до границата од 2 милијарди долари.
Со многу фанфари и минимална конкуренција во текот на летото, „Спајдермен: Сосема нов ден“ би можел да стане првиот филм што некогаш достигнал 1 милијарда долари на домашните бокс офиси.
Во зависност од неговата трајност, аналитичарите на бокс офисот сугерираат дека постои дури и можност овој епски филм за суперхерои да стане единствениот што достигнал 3 милијарди долари на глобално ниво.
Моментално, „Аватар“ и „Одмаздниците: Крајна игра“ се двата најуспешни филма во светот, со заработка од 2,9 милијарди и 2,7 милијарди долари, соодветно, по неколку реизданија.