Студија спроведена преку пет различни режими на возење покажа зошто бавното возење може да биде повозбудливо од брзото…
Брзото возење не гарантира најголемо возбудување зад воланот! Овој заклучок е донесен во студија во која учесниците возеле или биле возени во пет различни сценарија на затворена патека во Велика Британија – од бавен теренски полигон со теренец „Ленд Ровер Дефендер“, преку картинг, до тркачки автомобил „Мекларен Артур ГТ4“.
За време на тестовите, истражувачите ги следеле мозочните бранови, срцевиот ритам, спроводливоста на кожата и движењата на очите. Резултатите покажале дека најголемото чувство на возбуда се јавува кога физичката стимулација, менталниот предизвик и чувството на контрола се комбинираат во исто време, додека стравот останува во позадина.
Најголемото чувство на возбуда
Најизразеното возбудување е забележано додека возеле „Мекларен Артур ГТ4“. Учесниците ги фокусирале очите на идеалната патека низ кривините во просек 70 пати во минута, додека трепкале само 2,5 пати во минута. Нивниот просечен срцев ритам се зголемил за 43,8 отчукувања во минута.
Сепак, интересно е што картингот, иако се возел многу побавно, предизвикал повисоко ниво на возбуда отколку некои ситуации со многу поголеми брзини.
Брзината без контрола предизвикува страв
Најголемата разлика се појавила кога учесниците седеле како патници додека професионален возач возел агресивно. Наместо возбуда, нивната реакција била поконзистентна со стрес и страв. За време на возењето, тие имале дури 40 трепкања и 190 фокусирања на погледот во минута, додека во McLaren биле забележани само 2,5 трепкања и околу 70 фокусирања.
Дури и бавното возење надвор од патот, со брзина од само околу 8 км/ч, предизвикало поголемо чувство на возбуда отколку брзото возење со професионален возач.
Заклучокот од истражувањето, спроведено од Castrol во соработка со британската невролошка компанија Brainbox, е дека адреналинот зад воланот не е првенствено поврзан со максималната брзина. Концентрацијата, чувството за контрола и целосното фокусирање на возењето се многу поважни.