Основец прободен со нож во тепачка

Два инциденти во исто време во две основни училишта се случија утринава во Скопско.

Петнаесетгодишен ученик од основното училиште “Емин Дураку“ од скопското село Буковиќ, утрово околу 10,30 часот прободел со нож тринаестгодишен соученик од истото училиште. Му нанел повреди во раката и во стомакот, над левиот колк, по што побегнал. Полицијата трага по напаѓачот. Двајцата ученици биле од селото Семениште.

Вториот инцидент се случил во основното училиште “Дрита“ во селото Сарај. Служител од училиштето пријавил дека наставник од друго училиште пукал кон него во дворот на училиштето пред учениците. Полицијата излегла на местото на инцидентот и пронашла две чаури. Двајцата имале претходни недоразбирања. Полицијата трага по напаѓачите.

Од почетокот на годинава, инцидентите во училиштата се сè позачестени. Еден ученик  смртно настрада при ваква тепачка во средното градежно училиште „Здравко Цветковски“.