Добро ни е познато дека одржливото патување станува сè поважно. Тоа го препознаа и многу земји, па неодамна Германците овозможија бесплатно патување со возови низ целата земја. Но, дефинитивно не се единствените, бидејќи решија тоа да го направат и во Шпанија!
Секоја земја реагира на различни начини на зголемувањето на трошоците за живот на кои сме сведоци секој ден, а Шпанија одлучи да им помогне на своите граѓани, се чини, максимално. Како што објави порталот Тајмаут, по намалувањето на цените на јавниот превоз, ДДВ-то и данокот на гориво, властите најавија дека ќе ги направат бесплатни голем број средни и кратки патувања со воз.
Сите линии со приградски возови и сите регионални линии кои поврзуваат растојанија помали од 300 километри, а во исто време со кои управува националниот железнички превозник Ренфе, ќе бидат бесплатни од 1 септември до крајот на годината.
На тој начин туристите кои доаѓаат таму полесно ќе стигнат до подалечните делови на градот, но и од градот каде што се наоѓаат ќе можат целосно бесплатно да го посетат најблискиот друг град. Оваа одлука всушност се надоврзува на неодамнешната одлука за финансирање на јавниот превоз, каде што властите најавија попуст од 30 до 50 проценти на целиот јавен превоз.
Идејата е да се финансира целата работа со оданочување на банките и енергетските компании кои во моментов најмногу профитираат од високите сметки за енергија и каматите. Овој данок треба да стапи на сила во 2023 година.
Се разбира, намалувањето на цените на јавниот превоз (наспроти намалувањето на даноците за гориво) е исто така одлично за охрабрување на луѓето да се префрлат од загадувачкиот приватен транспорт. Затоа, ако размислувавте каде да патувате овој септември, мислиме дека нема да погрешите со Шпанија.