Доколку сте љубител на патувања и познати знаменитости, можете да ги видите сите светски чуда на едно место во Светскиот парк во Пекинг.
Станува збор за необичен парк во Кина во кој можат да уживаат сите генерации.
Светскиот парк Пекинг е тематски парк лоциран во главниот град на Кина, кој ви овозможува да го „видите целиот свет“ во еден град.
Зафаќа 46,7 хектари во југозападниот кварт Фенгтаи во Пекинг, кој е на околу 17 километри од плоштадот Тјенанмен.
Паркот е поделен на два дела – палубата за набљудување на која се прикажани копии од најпознатите споменици на денешницата во намалена форма и простор за шопинг, јадење и забава.
Веднаш на влезот ќе ве пречека готски замок и терасовидна градина со големи скалила, фонтани и скулптури инспирирани од европската ренесанса.
Светскиот парк во Пекинг вклучува неколку градини со минијатурни модели на најпознатите статуи во светот – од Статуата на слободата до Давид на Микеланџело до Малата сирена од Копенхаген.
Наместо да посетите стотици земји низ светот и да потрошите десетици илјади евра за патувања, хотели и превоз, во Пекинг Светскиот парк можете да ги видите сите светски чуда на едно место.
Вклучува околу сто копии на згради од целиот свет, поточно од Азија, Африка, Европа, Северна и Јужна Америка и Австралија.
Можете да видите намалена верзија на Ајфеловата кула, египетските пирамиди, операта во Сиднеј, па дури и реплика на оригиналните облакодери на Светскиот трговски центар во Њујорк кои беа уништени во терористичкиот напад на 11 септември 2001 година.
Светскиот парк во Пекинг е отворен во 1993 година, а годишно го посетуваат околу 1,5 милиони луѓе. Во забавниот дел на паркот можете да купите сувенири од целиот свет, но и да вкусите различни јадења од интернационалната кујна.
На посетителите им се достапни разни настани кои ги прикажуваат обичаите и културата на една земја.