Американскиот специјалист за стапала (подијатар) Рок Позитано предупреди дека големината на стапалото може да се промени со возраста и дека носењето премали чевли по 50-тата година го зголемува ризикот од болка и деформитети.
Тој изјави дека верувањето оти големината на чевлите останува иста во текот на целиот живот е погрешно. Како што истакна, малку е веројатно дека 50-годишник би носел ист број чевли како на 20-годишна возраст. Терминот „комплекс на Пепелашка“ се користи за да се опише обидот стапалото да се набие во премали чевли.
„Тоа е таканаречениот ‘комплекс на Пепелашка’ – обид да се смести стапало со број 39 во чевел со број 37“, изјави тој за „Њујорк пост“. Тој додаде дека таквите чевли можат да предизвикаат болка и деформитети кои сериозно го нарушуваат квалитетот на животот.
Промените на стапалата можат да настанат од различни причини. Зголемувањето на телесната тежина ја менува формата на стапалото, мускулите, тетивите и лигаментите, додека бременоста кај жените може да доведе до зголемување на големината на стапалото поради отоци и хормонот релаксин, кој ги олабавува лигаментите. Позитано истакна дека, како резултат на тоа, стапалото може да се зголеми за еден или два броја.
По 50-тата година, жените се поподложни на проблеми како што се болки во зглобовите, плантарен фасциитис (оштетување на сврзното ткиво), халукс валгус (испакнати коски на палецот) и деформитети на прстите. Тесните чевли, оние со тесен преден дел и високите потпетици – кои ја префрлаат тежината нанапред и ги принудуваат прстите да заземат неприродна положба – можат да придонесат за овие проблеми.
„Болката во стапалата и глуждовите можеби не е опасна по живот, но секако го нарушува начинот на живот“, предупредува Позитано. Тој препорача новите чевли да се купуваат попладне, кога стапалата се најотечени, да се мерат стапалата во стоечка положба и да се избираат чевли според поголемото стапало.
Помеѓу најдолгиот прст и врвот на чевелот треба да се остави простор со ширина на палецот, а обувките мора да бидат удобни веднаш, без да се потпирате на идејата дека подоцна ќе се разгазат.