Соодветниот внес на калциум е важен за здравјето на коските, особено како што старееме.
Јогуртот е познат како добар извор на овој минерал, а порција од околу 170 грама содржи приближно 284 милиграми калциум, што е околу 22 отсто од дневната вредност што се користи за етикетирање на храната. Сепак, некои други намирници и пијалоци може да содржат повеќе калциум по порција, пишува Health.com.
Млеко
Бидејќи јогуртот се прави од млеко, не е чудно што млекото е исто така добар извор на калциум. Една чаша млеко со два проценти млечна маст содржи околу 309 милиграми калциум. Млекото е извор и на протеини и калиум, а доколку е збогатено со витамин Д може да придонесе за внесување на тој витамин кој е важен за апсорпција на калциумот.
Кефир
Кефирот е ферментиран млечен напиток кој најчесто се произведува од кравјо, козјо или овчо млеко. Една чаша обичен кефир со малку маснотии содржи околу 316 милиграми калциум.
Неговиот состав е сличен на јогуртот, но традиционално се произведува со помош на зрна кефир, кои содржат бактерии и квасец. Кефирот може да содржи и живи микроорганизми кои имаат потенцијално корисен ефект врз здравјето на дигестивниот систем, но нивната количина и состав се разликуваат од производ до производ.
Која друга храна е добар извор на калциум?
Калциумот го има и во друга храна, како што се сардините што се јадат со коските, едамам (млада соја) и бадемите. Билни пијалоци и сокови збогатени со калциум исто така можат да бидат добар извор. Млекото и млечните производи се меѓу најпознатите извори на калциум бидејќи го содржат во значителни количини и телото може добро да го искористи. Сепак, можно е да се внесе доволно калциум преку разновидна исхрана која вклучува растителни извори.
Зошто е важен витаминот Д?
Витаминот Д е исто така важен за правилна апсорпција на калциумот, кој му помага на телото да го апсорбира во цревата. Затоа, освен за внесување калциум, треба да се грижите и за доволна количина на витамин Д. Можеме да го добиеме од одредени намирници, како што се масни риби и производи збогатени со витамин Д, а телото го произведува и кога кожата е изложена на сончева светлина.